“Filmit” me skenarin Shqiprim Arifi – Aleksandar Vuçiq “nuk i shitet asnjë biletë”
Ditë më parë, Drejtori i Shtëpisë së Kulturës në Bujanoc, Jetmir Ismaili dhe aktori Gani Veseli, i cili është njëkohësisht edhe drejtor i organizatës joqeveritare “Colosseum”, u arrestuan nga policia serbe.
Ky akt prej shtetit policor serb lidhej me shfaqjen e filmave me metrazh të shkurtër në Bujanoc, të financuar nga Qeveria e Republikës së Kosovës.
Para se të ndodhte arrestimi, për pasojë edhe pezullimi i shfaqjes së këtyre filmave, kryetari aktual i Komunës së Preshevës, Shqiprim Arifi kishte urdhëruar përmes drejtorit Kujtim Sadriu që ky aktivitet i financuar nga Republika e Kosovës të mos realizohej në Shtëpinë e Kulturës në Preshevë.
Me shumë të drejtë, Ragmi Mustafi në reagimin e tij ngrinte pyetjen se “A ju duket e dyshimtë që për të njëjtët filma, Shqiprimi dhe Policia e Serbisë kanë kundërshtime?”.
Nuk është hera e parë që hidhen aludime për një lidhje të Shqiprim Arifit me presidentin e Serbisë, Aleksandar Vuçiq. Edhe më parë, figura publike kanë ngritur dyshime rreth raportit të tyre që shihet si i ndërtuar në bazë të interesave të ndërsjellë: interesit (korruptiv) ekonomik dhe atij politik (ruajtja e influencës së Vuçiqit në Luginë të Preshevës dhe bllokimi i influencës së Republikës së Kosovës aty përmes një politikani të kontrolluar nga Beogradi, nga njëra anë, dhe ruajtja e pushtetit komunal nga Arifi, nga ana tjetër).
Këto aludime nuk janë vërtetuar ndonjëherë në kuptimin e rreptësisë juridike, por nga ana tjetër, u pa shumë mirë ditët e fundit se Shqiptrim Arifi ishte ndër më vokalët në ofensivën penguese ndaj Kryeministrit të Kosovës, Albin Kurtit dhe synimit të Republikës së Kosovës për shtrirjen e sovranitetit në veri të territorit të saj.
Por ajo që ndodhi sot ishte vërtet mjerane dhe qesharake. Pasi u radhit në front të sulmit ndaj Albin Kurtit, pasi ndaloi shfaqjen e filmave të financuar nga Republika e Kosovës në Preshevë, e pasi për pasojë u akuzua në opinion si mbrojtës i interesave të Vuçiqit, u raportua po ashtu se Arifi paska vendosur flamurin kombëtar në objektin e Komunës së Preshevës dhe për shkak të kësaj u thirr nga Gjykata e Serbisë “me arsyetimin se janë shkelur ligjet e këtij shteti për faktin e vendosjes së flamurit kombëtar shqiptar në hapësirë publike” (Ekspozimi i flamurit kombëtar shqiptar në territorin e Serbisë përbën shkelje të ligjeve në këtë shtet me mendësi fashizoide).
Nuk mund të thuhet me siguri nëse ka ngelur akoma ndonjë person që e beson këtë “film” të trilluar Vuçiq-Arifi? Është shumë e qartë që ky është një skenar i tyre, ku tentohet të shpëlahet figura e Shqiprim Arifit, ku ky paraqitet si patriot e me vlera kombëtariste përballë policisë serbe që e lufton.
Nuk e dimë se çfarë cilësie artistike kishin filmat e ndaluar nga Shqiprim Arifi dhe policia e Vuçiqit, por “filmi” me skenarin Vuçiq-Arifi është shumë i dobët dhe nuk po i shitet asnjë “biletë” te publiku shqiptar.
Rruga Press