Udhëheqësit e G7 bien dakord të vendosin sanksione të reja ndaj Rusisë

Udhëheqësit e shtatë vendeve më të industrializuara të botës, i njohur si Grupi i Shtatë (G7), kanë rënë dakord të vendosin sanksione të mëtejshme ndaj Rusisë dhe kanë “riafirmuar” angazhimin e tyre për të qëndruar kundër luftës “së paligjshme, të pajustifikueshme dhe të paprovokuar” të Moskës në Ukrainë.

Sanksionet dhe masat e mëtejshme synojnë “të rrisin kostot për Rusinë dhe ata që po mbështesin përpjekjet e saj luftarake” dhe të ndalin përpjekjet e “Rusisë që të shantazhojë përmes energjisë”, shkruan fillimisht në deklaratën e përbashkët të udhëheqësve të G7 në Hiroshima.

“Ne do të zgjerojmë veprimet tona për të siguruar që eksportet e të gjitha sendeve kritike për agresionin e Rusisë, përfshirë ato të përdorura nga Rusia në fushën e betejës, të kufizohen në të gjitha juridiksionet tona”, thuhet në deklaratë, raporton cnn.

Kjo do të përfshijë “eksportet e makinerive industriale, veglave dhe teknologjive të tjera që Rusia i shfrytëzon për të rindërtuar makinerinë e luftës”, vazhdoi deklarata.

Sektorët kryesorë që do të synohen përfshijnë prodhimin, ndërtimin dhe transportin si dhe shërbimet e biznesit.

Udhëheqësit thanë se ata “mbeten të përkushtuar” për të ruajtur kufijtë e çmimeve të naftës dhe produkteve të naftës ruse dhe do të rritin përpjekjet “për të kundërshtuar evazionin e këtyre kufijve duke shmangur efektet e përhapjes dhe ruajtjen e furnizimit global të energjisë”.

Udhëheqësit e G7 ripërtëriën gjithashtu angazhimin e tyre për të ofruar “mbështetje financiare, humanitare, ushtarake dhe diplomatike që kërkon Ukraina për aq kohë sa duhet”, duke i bërë jehonë premtimeve të mëparshme të mbështetjes për Kievin.

Rruga Press