Rritet numri i vrasjeve në Kosovë, shtohet edhe dhuna në familje

Përveç vrasjeve në Kosovë, shifrat kanë shënuar rritje edhe në dhunën në familje.

Vrasja e dyfishtë ka tronditur Prizrenin, kur të martën në mbrëmje, dyshohet se Sami Mazreku, 52 vjeç, polic kufitar i Kosovës, ekzekutoi me armën zyrtare, të bijën, Leonitën, 21 vjeç, e më pas kreu vetëvrasje. Familjarët deklarojnë se ishte vrasje aksidentale e prokuroria po kryen hetimet.

Kosova këtë vit shënon rritje të numrit të vrasjeve krahasuar me vitin e kaluar.

“Nga 19 sa i kemi pasur vitin e kaluar, i kemi 25 këtë vit dhe nënkupton se 31.57.% kemi ngritje”, u shpreh  Samedin Mehmeti, Drejtori i Përgjithshëm i Policisë.

Rastet kur policët vriten ose vetëvriten në Kosovë, nuk janë të pakta. Nga themelimi i Policisë së Kosovës në vitin 1999,  në rrethana të ndryshme kanë humbur 21 pjesëtarë të forcave të rendit. Ndërkohë, bashkë me vrasjet, edhe numri i dhunës në familje, sipas shifrave zyrtare, ka shënuar rritje.

“Ndërsa numri i rasteve të dhunës në familje, fatkeqësisht ka shënuar ngritje. Nga 1751 në 1861 ose ngritje prej 6.86%”, tha zoti Mehmeti më tej.

Megjithatë, numri i lëndimeve dhe vjedhjeve të rënda kanë pësuar ulje gjatë këtij viti, krahasuar me vitin e kaluar. Nga 147 ka rënë në 120 lëndime të rënda e nga 4131 vjedhje të rënda në 3492 raste të tilla.

“Nuk janë vetëm vjedhjet por edhe vrasjet sikurse një rast i tillë që ndodhi tre ditë më parë pikërisht në këtë vend, këtu në Prishtinë”, raportoi gazetari Jeton Musliu.

Në Prishtinë, një shtetas i Kosovës u ekzekutua në veturë nga një shtetas i huaj, i cili është në arrati.