Personat e zhdukur me forcë, Kosova ia dërgon kërkesën e parë Serbisë për hapjen e arkivave
Komisioni Qeveritar për Personat e Zhdukur i Kosovës i ka dërguar kërkesë presidentit serb, Aleksandër Vuçiq, për arkivat që do të ndihmojnë në zbardhjen e fatit të personave të zhdukur me forcë gjatë luftës.
Bazuar në Deklaratën për Persona të Zhdukur e nënshkruar në Bruksel nga Kosova dhe Serbia, Andin Hoti në emër të komisionit i ka dërguar kërkesën e parë “për qasje të plotë në materialin arkivor, përfshirë por jo e kufizuar në dokumentet e klasifikuara, të lëshuara nga Komanda e shpërbërë e Brigada 37 e ushtrisë jugosllave”.
“Dhënia e qasjes së plotë në këtë material do të shërbente për zbardhjen e rrethanave të vrasjeve dhe transferin e mbetjeve të shqiptarëve të zhdukur me forcë dhe do të kontribuoj direkt në zbardhjen e fatit të të zhdukurve me forcë në rajonin e Drenicës”, thuhet në shkresë.
Hoti ka thënë se kanë filluar me Drenicën sepse “pikërisht në Drenicë, Serbia ka filluar me krimet masive ndaj popullit shqiptar”.
Rruga Press