Masakra e Reçakut, Tritan Shehu: Regjimi censuron rezolutën tonë për dënimin e regjimit serb në Kosovë
Deputeti i PD-së Tritan Shehu i ka bërë thirrje sot Presidentit të Republikës së Shqipërisë, Bajram Begaj, të shprehet për gjenocidin serb në Kosovë, duke i parashtruar disa kërkesa.
Shehu shkruan se sot Presidenti ka rastin që të shprehet dhe pyet nëse do kërkojë që rezoluta e PD-së për njohjen e dënimin e gjenocidit serb në Kosovë mos të vazhdojë të censurohet më nga regjimi.
POSTIMI I PLOTË
Presidenti sot ka rastin që të shprehet.
Sot Presidenti do të dekorojë Walkerin, 24 vite nga masakra e Reçakut.
Shumë mirë kjo, thellësisht e merituar!
Por a do të kërkojë Presidenti që Rezoluta jonë për njohjen e dënimin e Genocidit serb në Kosovë, mos të vazhdojë të censurohet nga regjimi?!
Që Kuvendi i ynë ta njohë, dënojë atë genocid?
Sepse “fytyra” e atij genocidi u shpalos para botës me atë masakër, që Walkeri me kurajo denoncoi.
Ndërsa prej një viti Rama&Co nuk lejojnë të futet në Kuvend kërkesa e jonë për Debat, për njohjen e dënimin e gjenocidit serb në Kosovë.
Të cilin edhe Serbia vetë duhet ta pranojë e dënojë, e rëndësishme kjo për stabilitetin e Rajonit.
Pa dyshim janë kërkesat e Vuçiqit që nuk lejojnë hapjen e atij debati edhe në Parlamentin tonë.
Ndërsa dje Walkeri përmendi direkt Vuçiqin me Millosheviqin, si censuruesit e atëhershëm të të vërtetës për atë masakër, pjesë ajo e genocidit serb.
Vuçiqi vazhdon të njëjtat përpjekje!
Kjo është e kuptueshme, sepse ministër i propagandës së Millosheviqit ka qenë ai…
Por që ai të komandojë edhe Kuvendin e Shqipërisë, kjo është antikombëtare, anti Kosovë, ndesh me interesat e Rajonit, e rrezikshme.
Prandaj i bëj thirrje Presidentit që sot, me rastin e dekorimit të Walkerit:
1-Të shprehet qartësisht për gjenocidin serb në Kosovë.
2-Të theksojë domosdoshmërinë e njohjes e dënimit të tij nga Kuvendi i Shqipërisë.
3-T’i kërkojë Serbisë të bëjë të njëjtën gjë, ashtu si ia ka kërkuar Parlamenti Evropian.
Kjo do t’i jepte më shumë vlera edhe dekorimit të figurës madhore të Walkerit.
Sepse Walkeri i hoqi para botës “petët” atij genocidi, duke e quajtur atë me emrin real:
Genocid e vetëm Genocid!
Rruga Press