Kompania ndërkombëtare e bananeve ka financuar grupin paramilitar kolumbian

Një gjykatë në Shtetet e Bashkuara ka bërë përgjegjëse kompaninë shumëkombëshe të frutave “Chiquita Brands International” për financimin e një grupi paraushtarak kolumbian.

Grupi, Forcat e Bashkuara të Vetë-Mbrojtjes së Kolumbisë (AUC), u shpall nga SHBA-ja një organizatë terroriste në atë kohë, raporton BBC.

AUC-ja raportohet se është e përfshirë në abuzime të gjera të të drejtave të njeriut, duke përfshirë vrasjen e njerëzve të cilët ishin nën dyshime për lidhje me rebelët e krahut të majtë.

Pas një çështjeje civile të ngritur nga tetë familje kolumbiane, të afërmit e të cilëve u vranë nga AUC-ja, Chiquita është urdhëruar të paguajë 38.3 milionë dollarë si dëmshpërblim për familjet.

Juria në këtë çështje, në një gjykatë federale në Florida, e shpalli Chiquitan përgjegjëse për vdekjen e tetë burrave të vrarë nga AUC-ja.

Viktimat varionin, nga sindikalistët deri tek punëtorët e bananeve.

Gjatë gjyqit të vitit 2007, u zbulua se Chiquita kishte bërë pagesa në vlerë prej më shumë se 1.7 milion dollarë në AUC në gjashtë vjet, nga 1997 deri në 2004.

Gjigandi i bananeve ka thënë se filloi të bënte pagesat pasi udhëheqësi i AUC-së në atë kohë, Carlos Castaño, la të kuptohej se stafi dhe pronat që i përkasin filialit të Chiquita-s në Kolumbi mund të dëmtoheshin nëse paratë nuk do të jepeshin.

Avokatët për Chiquita argumentuan se kompania nuk kishte zgjidhje tjetër veçse të paguante AUC-në për të mbrojtur punonjësit e saj kolumbianë nga dhuna.

Por paditësit argumentuan se kompania formoi “një aleancë me AUC-në” në një kohë kur Chiquita po zgjeronte praninë e saj në rajonet e kontrolluara nga AUC-ja.

Pagesat e rregullta vazhduan edhe pasi AUC-ja u shpall nga SHBA-ja si një organizatë e huaj terroriste në vitin 2001.

Rruga Press