Ja makina superluksoze që Qeveria e MV-së ia dhuroi ish-kryeministrit Zaev

Qeveria e Maqedonisë së Veriut me anë të një vendimi i ka ndarë një makinë superluksoze Zoran Zaevit, pas dorëheqjes dhe largimit nga posti i kryeministrit. Bëhet fjalë për një makinë “Skoda Superb” e vitit 2021.

Sipas ndryshimeve në Ligjin për Qeverinë të bëra në vitin 2016, kryeministri i sapodorëhequr në këtë rast Zaev kishte të drejtë ta përdorë këtë makinë për aq kohë sa ishte në krye të Qeverisë.

Më herët, në vitin 2020, kur Zaev dha dorëheqjen gjatë formimit të qeverisë teknike u shpërblye me një “Volkswagen Passat Limousine” prodhim i vitit 2018 dhe me kapacitet motori 2000 cm3.

Verën e kaluar, qeveria shpalli tender për 45 automjete luksoze Skoda Superb me vlerë 1.5 milionë euro pa TVSH. Makinat u morën me “lizing” me këstin mujor për një automjet është 60 mijë denarë me TVSH, ndërsa çmimi i përgjithshëm i një veture arrin rreth 40 mijë euro.

Më 17 janar, në të njëjtën ditë kur u mor vendimi, Zaev në një prononcim për portalin A1on tha se nuk do të shfrytëzojë të drejtën e apanazhit, as të makinës dhe as të shoferit. Ai thotë se do ta shfrytëzojë pjesërisht vetëm të drejtën për siguri. Ai ka të drejtën e gjashtë truprojave, të cilët mund t’i zgjedhë që t’i ketë pranë 24 orë në ditë.

“Do të punësohem në firma familjare, pra do të përdor automjetin e njërës prej kompanive, do të marr rrogën atje, kështu që nuk do të përdor apanazh”, tha ish-kryeministri.

Në maj të vitit 2017, pak para largimit të tij, Qeveria i dha Gruevskit një Volkswagen Passat 3c të prodhuar në vitin 2015. Më 19 tetor 2017, qeveria e re i dha Dimitrievit një automjet zyrtar Passat të vitit 2015.

Rruga Press