Dënohet me 8 muaj burg një nga kryengritësit e sulmit në Kapitol, Hodgkins: Jam penduar vërtet për veprimet e mia

 Një burrë nga Florida u dënua me tetë muaj burg të hënën, duke shënuar dënimin e parë për krim nga trazirat vdekjeprurëse të 6 janarit në Kapitol.

Paul Allard Hodgkins, 38 vjeç, nga Tampa, u arrestua në shkurt pasi FBI-ja mori një informatë që e identifikonte atë duke mbajtur një flamur të madh “Trump 2020” në hollin e Senatit Amerikan.

Sipas CNBC, Hodgkins u deklarua fajtor në qershor për një akuzë të vetme krimi për pengimin e një procedimi zyrtar. Krimi i rëndë ka një dënim maksimal prej 20 vjet burg. Pas dënimit të tij me burg, Hodgkins do të vendoset nën dy vjet lirim me kusht.

“Megjithëse ishit vetëm një anëtar i një turme më të madhe, ju morët pjesë aktivisht në një ngjarje më të madhe që kërcënoi Kapitolin dhe vetë demokracinë,”-tha gjykatësi i Gjykatës së Qarkut në SHBA, Randolph Moss, gjatë procedimit dy-orësh të gjykatës.

Hodgkins i përshkroi veprimet e tij më 6 janar si rezultat i një “vendimi idiot” dhe i tha gjykatës se ai ishte “zënë në një protestë emocionale”.

“Unë mund të them pa asnjë hije dyshimi se jam penduar vërtet për veprimet e mia, jo sepse përballem me pasoja, por për shkak të dëmit që shkaktoi incidenti i asaj dite dhe mënyrës se si është dëmtuar ky vend që unë dua”, tha Hodgkins.

Hodgkins është personi i tretë që dënohet për të qenë pjesë e trazirave në Kapitol të SHBA-së. Në qershor, një gruaje nga Indiana iu dha tre vjet provë pasi u deklarua fajtore për akuzën e demonstrimit të paligjshëm në Kapitol. Javën e kaluar një burrë nga Florida u dënua me gjashtë muaj burg pasi u deklarua fajtor për një akuzë për kundërvajtje.

Më shumë se 500 njerëz janë akuzuar për krime federale për rolin e tyre në pushtimin e Kapitolit në 6 Janar. Trazirat që shpërthyen në Uashington e detyruan Kongresin të tërhiqej nga seanca e përbashkët që ishte planifikuar të shpallte zyrtarisht fitoren e Joe Biden në Nëntor.

Rruga Press