Tajvani nën rrethim, Pekini dërgon ushtri rreth ishullit

Ushtria e Kinës ka nisur operacionet ushtarake në brigjet e Tajvanit, njoftoi Televizioni Qendror i Kinës, duke cituar përfaqësuesin zyrtar të Komandës Luftarake të Zonës Lindore, Shi Jia.

“Sonte, Komanda Luftarake Lindore e Ushtrisë Çlirimtare Popullore Kineze filloi një seri operacionesh të përbashkëta ushtarake rreth ishullit të Tajvanit, si dhe stërvitje të përbashkëta ajrore dhe detare në det dhe hapësirën ajrore në veri, jugperëndim dhe juglindje të Tajvan”, raportoi televizioni kinez të martën mbrëma.

Stërvitja ushtarake shihet si një reagim në përgjigje të vizitës në Tajvan së kryetares së Dhomës së Përfaqësuesve të Shteteve të Bashkuara, Nancy Pelosi, tha mbrëmjen e 2 gushtit Ministria kineze e Mbrojtjes.

Me të mbërritur në Tajvan, Pelosi tha se solidariteti i SHBA-së me popullin tajvanez është më i rëndësishëm se kurrë më parë.

Vizita e saj ka rritur tensionet midis Pekinit dhe Uashingtonit, teksa Kina ka thënë se vizita e Pelosit “cenon seriozisht sovranitetin dhe integritetin territorial të Kinës”.

Po ashtu, më 2 gusht, autoritetet e mbrojtjes në Tajvan, njoftuan se 21 avionë luftarakë kinezë kanë fluturuar mbi Tajvan.

Autoritetet e Tajvanit kanë thënë se do të përkujdesen për stabilitetin dhe sigurinë rreth ishullit.

Rritja e nivelit të gatishmërisë së Ushtrisë së Tajvanit vjen pasi që Kina ka njoftuar për tri ditë manovra ushtarake rreth ishullit, duke filluar nga dita e enjte.

Qeveria e Tajvanit ka kritikuar këtë lëvizje, duke thënë se manovrat e Kinës do të çojnë në bllokim nga ajri dhe deti.

“Këto manovra pushtojnë hapësirën territoriale të Tajvanit dhe çojnë në bllokim të hapësirës ajrore dhe detare të Tajvanit”, është thënë nga ushtria.

Shtetet fqinje aziatike kanë reaguar dike bërë thirrje për dialog.

Koreja e Jugut ka thënë se do të mbajë komunikim të ngushtë me gjitha shtetet e përfshira dhe u ka bërë thirrje për dialog e bashkëpunim.

Ndërkohë Japonia ka shprehur shqetësimin për planet e Pekinit për stërvitje ushtarake, që thuhet se do të ndodhin në ujërat rreth territorit të saj. Japonia ka ishuj në afërsi të Tajvanit.

Ndërkohë Koreja e Veriut ka kritikuar vizitën e Pelosit, duke e quajtur si ndërhyrje amerikane në çështjet e shteteve tjera.

Rruga Press