Stoltenberg: Nuk ka indikacione se Rusia po bën gati ofensivë ushtarake kundër NATO-s
Sekretari i përgjithshëm i NATO-s, Jens Stoltenberg, ka thënë se “nuk ka indikacione” se shpërthimi i raketës në Poloni ishte rezultat i një “sulmi të qëllimshëm”.
“Nuk ka indikacione se Rusia po bën gati një ofensivë ushtarake kundër NATO-s”, ka thënë Stoltenberg, raporton BBC.
Ai ka thënë se hetimet po vazhdojnë dhe se duhet pritur rezultatet.
Stoltenberg ka folur pas takimit urgjent të NATO-s.
Stoltenberg ka thënë se incidenti në Poloni, ku vdiqën dy qytetarë, “me gjasë” është shkaktuar nga një aktivitet i sistemit të mbrojtjes ajrore të Ukrainës. Ngjashëm kishte deklaruar edhe presidenti i Polonisë, Andrzej Duda.
Mirëpo, Stoltenberg, ka thënë se përgjegjësia është e Rusisë “pasi vazhdon luftën ilegale kundër Ukrainës”.
Stoltenberg ka thënë se aleatët e NATO-s i kanë dhënë përkrahje të madhe Polonisë dhe kanë shprehur ngushëllimet e thella për rastin që ndodhi të martën mbrëma.
Ai ka thënë se NATO ka rritur dukshëm prezencën ushtarake që kur nisi pushtimi rus i Ukrainës më 24 shkurt.
“Ne vazhdimisht e vlerësojmë se çfarë tjetër mund të bëjmë”, ka thënë Stoltenberg.
Rruga Press