Sot protestohet në Prishtinë kundër Asociacionit

Përkrahës të sovranitetit të Kosovës sot do të protestojnë kundër presionit ndërkombëtar për themelimin e Asociacionit të Komunave me Shumicë Serbe.

Protesta do të zhvillohet në sheshin “Zahir Pajaziti” në Prishtinë, në orën 12:00.

Kujtojmë se të hënën fondacioni “Friedrich Ebert” (FES) në Prishtinë ka prezantuar draft-statutin për “Asociacionin e Komunave në të cilat komuniteti serb i Kosovës është shumicë”, i hartuar nga kjo organizatë në partneritet me Institutin Evropian për Paqe (EIP).

Sipas këtij draft-statuti, Asociacioni do të formohet në përputhje me Kushtetutën e Republikës së Kosovës.

Mirëpo, përkundër presionit ndërkombëtar, kryeministri Albin Kurti është duke refuzuar ta themelojë Asociacionin, me arsyetimin se një gjë e tillë do ta pengonte funksionalizimin normal të shtetit të Kosovës.

Ndryshe ka vepruar opozita, e cila e ka lehtësuar veten nga detyra e të shprehurit për sovranitetin e shtetit, duke hedhur mbi qeverinë gjithë përgjegjësinë e presionin, ndërkohë që kryeministri Albin Kurti kur ishte në opozitë ishte kundërshtari më i madh i zajednicës.

Rruga Press