Sinani pas ndalesës që iu bë mbrëmë në kufi: Kjo është Serbia për pakicat kombëtare

Ardita Sinani, këshilltare e kryeministrit të Kosovës Albin Kurti, mbrëmë sërish është ndaluar pa arsye në kufi nga policia kufitare e Serbisë.

“Zëri” ka raportuar mbrëmë se derisa po kthehej nga Kosova ajo është ndaluar në pikën kufitare në Muçibabë.

Për këto sot foli vetë Sinani, e cila është ndaluar dje dy herë nga policia kufitare serbe në hyrje-dalje të Kosovës.

Ajo ka thënë se kjo tregon se çfarë është Serbia për pakicat kombëtare, transmeton Zeri.info.

Reagimi i plotë:

Mbrëmë rreth orës 21:00 në vendkalimin e njëjtë kufitar me Republikën e Kosovës, Muçibabë, përsëri u ndalova nga policia kufitare serbe. Për herë të dytë brenda të njëjtës ditë. Jo vetëm duke e lëshuar Serbinë, por edhe duke hyrë. Këtë herë periudha kohore ishte më e shkurtër se në orët e mëngjesit të djeshëm. Edhe kësaj radhe pa asnjë sqarim e arsyetim! Thjesht ndalesë!

Kjo është Serbia me të cilën si shqiptarë të Luginës së Preshevës ballafaqohemi çdo ditë. Kjo është Serbia për pakicat kombëtare.

Rruga Press