Shtëpia e Fadil Muqollit në Poklek të Drenasit do të shndërrohet në muze për të përkujtuar masakrën e 1999

Ministria e Kulturës, Rinisë dhe Sportit ka njoftuar se ministri Hajrullah Çeku së bashku me deputeten Shqipe Selimi kanë vizituar punimet në shtëpinë e Fadil Muqollit në Poklek të Drenasit.

Në njoftimin e MKRS-së thuhet se shtëpia e Muqollit do të shndërrohet në muze si gjurmë e masakrës që ka ndodhur në Poklek.

“Fadil Muqolli ka ruajtur me fanatizëm për 24 vite çdo gjurmë në shtëpinë e tij që dëshmon krimin që është bërë aty në vitin 1999.

Shtëpia dhe rrëfimi i tij i cili çdo herë që tregohet mban dhimbjen e njejtë, do të kthehet në muze.

Jemi në fazën e fundit të muzealizimit të shtëpisë së masakrës në Poklek të Drenasit, ku forcat serbe masakruan 53 civilë nga familjet Muqolli, Caraku, Elshani, dhe Hoxha. Në mesin e tyre ishin 23 fëmijë, më i vogli gjashtë muajsh dhe më i madhi 14 vjeç”, thuhet në njoftim.

Rruga Press