Shtëpia e Bardhë paraqet planin e vaksinimit kundër lisë së majmunit

Shtëpia e Bardhë po planifikon të dërgojë mijëra vaksina kundër lisë së majmunit nëpër  shtete si pjesë e një fushate federale në rritje për të ndalur shpërthimin e sëmundjes.

Zyrtarët thonë se po punojnë gjithashtu për të shtuar testimin dhe kanë zgjeruar grupin e njerëzve që këshillohen të vaksinohen, njofton BBC.

Virusi, i cili zakonisht gjendet vetëm në Afrikë, është përhapur në SHBA dhe Evropë me shpejtësi befasuese.

Deri më tani në SHBA janë regjistruar 306 raste dhe asnjë vdekje.

Zyrtarët shëndetësorë amerikanë paralajmëruan në një konferencë për media të martën se numri i vërtetë i rasteve është ndoshta më i lartë.

Globalisht, ka pasur mbi 4,700 raste të raportuara në 49 vende që nga muaji i kaluar.

Direktiva e fundit nga qeveria federale kërkon vaksinim për këdo që beson se është ekspozuar ndaj lisë së majmunit.

Më parë, vaksinat u ofroheshin vetëm njerëzve që kishin pasur një ekspozim ndaj saj.

Grupi i njerëzve që tani këshillohen për vaksinim përfshin burra që kryejnë marrëdhënie seksuale me burra dhe që së fundmi kanë kryer marrëdhënie seksuale ose kanë qenë në grumbullime në qytete ku janë identifikuar raste.

Shumica e rasteve deri më tani në SHBA kanë qenë te meshkujt që kryejnë marrëdhënie seksuale me meshkuj, por zyrtarët theksojnë se çdokush mund të infektohet. 

Departamenti amerikan i Shëndetësisë dhe Shërbimeve Njerëzore do të fillojë shpërndarjen e 56,000 dozave të vaksinës Jynneos me dy doza, e cila prodhohet nga një kompani daneze e quajtur Bavarian Nordic, thanë zyrtarët.

Megjithatë, SHBA ka vetëm 64,000 doza Jynneos në stokun e saj dhe ka bërë një porosi për më shumë. Zyrtarët thonë se planifikojnë të vënë në dispozicion 1.25 milion doza gjatë gjithë verës dhe vjeshtës.

Një vaksinë e vjetër kundër lisë, e quajtur ACAM2000, mund të përdoret gjithashtu nëse furnizimet e Jynneos mbarojnë, por zyrtarët thonë se ajo mbart një rrezik më të madh të komplikimeve.

Jynneos është miratuar nga Administrata e Ushqimit dhe Barnave dhe mund të ndalojë infeksionin pasi një person është i ekspozuar ndaj virusit.

Në fillim të kësaj jave, Nju Jorku dhe Uashingtoni filluan shpërndarjen e vaksinave, por shpejt i mbaruan  furnizimet.

Lija e majmunit nuk përhapet lehtë ndërmjet njerëzve, por mund të transmetohet përmes kontaktit të ngushtë me lëkurën, rrobat, shtratin dhe peshqirët. Infeksioni zakonisht largohet vetë nga 14 deri në 21 ditë.