Shqipëri – 200 trupa ushtarakë në gatishmëri të NATO-s në rast përshkallëzimi
Ministri i Mbrojtjes, Niko Peleshi, tha se Shqipëria ka rreth 200 trupa ushtarake në pozicione të ndryshme, në gatishmëri për t’u alokuar sipas kërkesave të NATO-s, në rast të një nevoje nga përshkallëzimi i luftës në Ukrainë.
Peleshi theksoi se Shqipëria ka prej kohësh një trupë prej 20 ushtarësh në Letoni, ndërsa kohët e fundit ka zhvendosur edhe 30 forca speciale në Kosovë, për të kontribuuar në rritjen e sigurisë në Kosovë dhe rajon.
Ai shtoi se forcat ushtarake shqiptare ka po ashtu një grup të gatshëm prej 100 trupash që t’i dërgojnë në kufijtë lindore të NATO-s.
Niko Peleshi u shpreh se Rusia ka kryer një agresion të pashembullt në historinë e pas Luftës së Dytë Botërore, por është shumë larg të mendohet se kufijtë e NATO-s mund të preken.
Si pjesë e NATO-s, ministri Peleshi theksoi se Shqipëria është e sigurt.
Megjithatë, ai sqaroi se për shkak të agresionit rus, NATO po e shton sigurinë e saj në kufijtë e saj lindorë.
Rruga Press