Shefi i inteligjencës ukrainase zbulon se si ra miti i ushtrisë së “fortë” ruse

Para pushtimit të Ukrainës, askush nuk do të kishte besuar se ukrainasit mund t’i bënin ballë forcave të armatosura ruse, shkruan gazeta zvicerane Blick. Kreu i shërbimit sekret ukrainas shpjegon pse dhe çfarë duhet për të mposhtur Rusinë.

Së pari përparimi rus u ndal, pastaj forcat e armatosura dështuan në marrjen e Kievit. Së fundi anija flamurtare e flotës ruse të Detit të Zi, “Moska”, u fundos nga raketat ukrainase.

“Edhe një herë, kjo hedh poshtë mitin e ushtrisë së fuqishme ruse”, tha kreu i shërbimit të inteligjencës ushtarake ukrainase, gjeneralmajor Kyrylo Budanov në një intervistë për “Spiegel”.

“Të paaftë dhe të pakujdesshëm”

Ndërkohë, forcat e armatosura ruse po rigrupohen në lindje të vendit. Së shpejti do të pasojë një ofensivë. Budanovi nuk është i befasuar që plani fillestar i sulmit të Vladimir Putinit dështoi. “Ajo që më befason mua është diçka tjetër: Sa të paaftë dhe neglizhentë u qasën komandantët rusë në zbatimin e një operacioni kaq të madh”, thotë ai.

Budanovi është i bindur se komandantët supozuan se ata mund të merrnin pushtetin në Ukrainë brenda tre ditësh. “Udhëheqja ruse duhet të pyesë veten se sa kompetentë janë gjeneralët e saj.” Ukrainasit gjithashtu do të kishin pyetur veten pse kaq shumë gjeneralë – tashmë tetë prej tyre – kanë vdekur. “Kemi gjetur vetëm një përgjigje: nivelin jashtëzakonisht të ulët profesional të gjeneralëve. Ata janë gjeneralë të motit të mirë, të afërm të disa nëpunësve civilë që nuk janë në lartësinë e detyrave të tyre”.

“Kuptim thjesht simbolik”

Përveç shumë ushtarëve të vdekur dhe gjeneralëve të rënë, Budanovi përmend një shembull tjetër të dështimit të Moskës: Ushtria ruse kishte pozicionuar vazhdimisht pajisje ushtarake në një aeroport afër Kersonit. Çdo herë që u shkatërrua nga ushtria ukrainase – gjithsej pesëmbëdhjetë herë. “Është një monument idiotësisë”, thotë Budanovi.

Nga këndvështrimi i Budanovit, luftëtarët e frikshëm çeçenë nuk janë aq të fortë sa mendojnë të gjithë. “Ato kanë një kuptim thjesht simbolik,” thotë ai. Çeçenët nuk morën pjesë as edhe në një operacion të vetëm të madh luftarak. “Ata ishin gjithmonë prapa vijës së frontit për të plaçkitur, përdhunuar apo vrarë”.

Ukraina dëshiron të rimarrë Krimenë

Deri më tani, ushtria ukrainase ka sfiduar Rusinë. Sipas Budanovit, armët nga perëndimi nevojiten urgjentisht, duke përfshirë sistemet e artilerisë, në mënyrë që ato të vazhdojnë të jenë të suksesshme. “Na duhen tanke, sepse kemi pasur humbje shumë të mëdha të mjeteve të blinduara”, thotë ai.

Që të mund të çlirohen territoret e pushtuara nevojiten armë të rënda. Sipas Budanovit, në këto zona përfshihet edhe Gadishulli i Krimesë, i cili u aneksua nga Rusia në vitin 2014. Budanovi nuk e di se sa gjatë Rusia mund të mbajë rrethimin – dhe sa gjatë Ukraina mund t’i rezistojë sulmit. Por: “Sa më shumë që pjesa tjetër e botës të arrijë të veprojë së bashku për këtë çështje, aq më shpejt do të shteren këto burime. Përveç kësaj, mund të them vetëm se: Ukraina ekzistonte para këtij sulmi, ekziston tani, do të ekzistojë në të ardhmen. Putini nuk mund të bëjë asgjë për këtë.” 

Rruga Press