Serbisë i kërkohet të korrigjojë tekstet shkollore që mohojnë gjuhën kroate
Kryeministri kroat Andrej Plenkoviç i kërkoi presidentit serb Aleksandër Vuçiç që të trajtojë çështjen e teksteve shkollore që e përshkruajnë gjuhën kroate si një variant të serbishtes.
Kryeministri kroat Andrej Plenkoviç i tha presidentit serb Aleksandër Vuçiç në një takim në prag të samitit BE-Ballkan Perëndimor në Slloveni se ai dëshiron korrigjimin e një teksti shkollor i cili i përshkruan gjuhët kroate, boshnjake dhe malazeze si versione të serbishtes.
“I thashë që ta zgjidhë këtë çështje në lidhje me tekstin që praktikisht mohon ekzistencën e gjuhës kroate. Kjo nuk është mirë dhe ai është në dijeni të kësaj çështjeje. Ai tha se do të shohë ç‘mund të bëjë”, tha Plenkoviç, raportoi gazeta Telegram.
Plenkoviç tha të martën se mohimi i tekstit shkollor serb për ekzistencën e gjuhës kroate ishte skandaloz dhe i papranueshëm.
“Ambasada kroate në Beograd dhe Ministria e Punëve të Jashtme kanë një detyrë të qartë për të dërguar nota proteste në Serbi se kjo është e papranueshme”, tha ai, raportoi transmetuesi publik HRT.
“Unë pres që Serbia ta korrigjojë anomali të tilla në tekstet e tyre shkollore dhe nuk e kuptoj qëllimin e kësaj si dhe me çfarë mençurie dhe kuptimi ka ndodhur kjo”, shtoi ai.
Vuçiç u tha mediave të mërkurën se Plenkoviç e kishte ngritur çështjen dhe premtoi se autoritetet serbe “do ta shikojnë dhe do ta marrin parasysh”.
Sipas agjencisë së lajmeve HINA, një e përjavshme lokale në gjuhën kroate në rajonin e Vojvodinës të Serbisë, Hrvatska Rijec, raportoi se një libër gramatikor për nxënësit e klasës së tetë thotë se gjuhët serbe, sllovene, maqedonase dhe bullgare janë gjuhë sllave të jugut ndërsa “kroatët, boshnjakët dhe disa malazezë e quajnë gjuhën serbe kroate, bosniane, boshnjake ose malazeze”.
Teksti shkollor u miratua nga Instituti Serb për Përmirësimin e Arsimit, një institucion arsimor shtetëror.
Ministri i Punëve të Jashtme dhe Evropiane të Kroacisë, Gordan Grlic Radman e përshkroi sjelljen e autoriteteve serbe si “të turpshme”, ndërsa presidenti Zoran Milanoviç sugjeroi që Kroacia mund të marrë masa kundër kësaj.
“Ne nuk mund të përcaktojmë se çfarë do të shkruhet në tekstet shkollore në Serbi, por mund të fillojmë të mendojmë për masa reciproke. Republika e Kroacisë ka një nivel të lartë mbrojtjeje të pakicave, padyshim që ky qëndrim ndaj kroatëve në vendet fqinje nuk ekziston”, tha Milanoviç.
Sipas një regjistrimi të popullsisë në 2011, në Serbi jetonin 57,900 kroatë, që përfaqësonin rreth 0.8 për qind të popullsisë së vendit. Shumica jetojnë në rajonin verior të Vojvodinës.
Formulimi i tekstit shkollor serb është kritikuar gjithashtu nga Instituti i Gjuhës dhe Linguistikës Kroate, një institucion arsimor shtetëror kroat, nga Tomislav Zigmanov, kryetari i Lidhjes Demokratike të Kroatëve në Vojvodina, një parti politike në Serbi, dhe nga Jasna Vojnic, presidente e Këshillit Kombëtar Kroat në Serbi, një organizatë që përfaqëson interesat e pakicës kroate në vend./balkaninsight/