Reka e quan analogji false krahasimin që Putini i bëri Kosovës me Krimenë dhe Donbasin

Ish-ministri i Integrimit Evropian, Blerim Reka, ka thënë se analogjinë e mëhershme false të “Krimesë me Kosovën”, të martën presidenti rus, Vladimir Putin e “begatoi” edhe me atë të Donbasit.

Sipas tij, në takimin me sekretarin e përgjithshëm të OKB-së, Antonio Guterres, Putini u mundua ta shesë krahasimin e paqëndrueshëm të dy rasteve krejtësisht të ndryshme.

“Pavarësia e Kosovës lindi nga lufta çlirimtare kundër një shteti të huaj pushtues që ushtronte aparthejd dhe gjenocid kundër popullatës shqiptare. Ndërkaq, Kremlini njohu njëanshëm ‘pavarësinë’ e Krimesë, Donjeckut e Luganskut për t’i bashkuar Rusisë. Kosova, pra luftoi për çlirim kundër shtetit të huaj (Serbisë), duke e mbrojtur territorin e vet nga ky pushtim. Krimea dhe Donbasi, ndërkaq u ‘pavarësuan’ me pushtimin nga një shtet i huaj (Rusia) duke shkëputur territor të Ukrainës”, ka shkruar Reka në një postim në Facebook.

E këtë Reka thotë se Putini nuk e bëri pse nuk e dinte, pasi Rusia është një nga pesë shtetet anëtare të përhershme të Këshillit të Sigurimit.

“Aq më tepër që edhe Gjykata Ndërkombëtare e Drejtësisë i dallon qartë këto dy raste, duke vendosur ndryshe”, ka shkruar ai.

Sipas tij, në vitin 2010, GJND-ja konkludoi se pavarësia e Kosovës nuk e shkeli të drejtën ndërkombëtare. Reka thekson se po kjo gjykatë e OKB-së muajin e kaluar, e dënoi invazionin rus në Ukrainë, si shkelje të së drejtës ndërkombëtare.

“Më qartë se kaq shëndosh. Mirëpo, ‘analogjia’ e Putinit synon mbajtjen e Serbisë në orbitën ruse para ‘hapjes së letrave’ në ‘pokerin e madh’ në East River. Kuptohet, nëse ndërkohë, ai nuk gjykohet për krime lufte”, ka shkruar ai.

Rruga Press