Projekti i rrugës së re i lë pa akses/ Nuk është parashikuar një hyrje-dalje, banorët e Mirakës në Librazhd paralajmërojnë protestë

Banorët e fshatit Mirakë dhe të disa zonave përreth në Njësitë Administrative Polis dhe Valë, në bashkinë e Librazhdit, kanë paralajmëruar një protestë ditën e hënë kundër projektit të zgjerimit të segmentit Elbasan–Qafë Thanë, Faza II, pjesë e Koridorit VIII.

Protesta pritet të nisë në orën 09:00, ndërsa banorët sqarojnë se nuk kundërshtojnë ndërtimin e rrugës së re, por mënyrën se si është hartuar projekti, i cili sipas tyre nuk parashikon një hyrje-dalje në karrexhatën e majtë për t’u lidhur me fshatrat Mirakë, Gostimë, Qendër, Gurshpatë, Vilan, Sheh dhe Valë.

Sipas banorëve, mungesa e një aksesi të drejtpërdrejtë në rrugën kryesore do të sjellë izolim për mijëra banorë, duke vështirësuar lëvizjen e përditshme, transportin e prodhimeve bujqësore, shërbimet e transportit publik dhe ndërhyrjet në raste emergjencash.

Në kërkesën që i kanë dërguar Autoritetit Rrugor Shqiptar më 9 korrik 2026, banorët kanë propozuar ndërtimin e një hyrje-daljeje në kilometrat 5+400 dhe 5+800, duke shfrytëzuar edhe infrastrukturën ekzistuese pranë urës së Mirakës dhe një hapësirë pushimi përgjatë aksit.

Ata argumentojnë se zgjidhja aktuale përmes Nyjës së Xibrakës shton rreth 6 kilometra në itinerar, ndërsa në raste urgjencash shëndetësore, sipas tyre, ambulancave u duhen edhe 15 deri në 20 minuta më shumë për të mbërritur te banorët.

Rruga Press