Presioni ndaj serbëve në veri vjen drejtpërdrejt nga BIA dhe diktatori Vuçiq

Analisti serb i cili jeton në veri të Kosovës, Branisllav Kërstiq, duke folur hapur për kërcënimet dhe frikësimin e popullatës serbe në veri të cilët dëshirojnë ta pranojnë pavarësinë dhe institucionet e Republikës së Kosovës, thotë se shantazhimi dhe presioni ndaj tyre vjen drejtpërdrejt nga shërbimi sekret serb BIA dhe presidenti i Serbisë, Aleksandar Vuçiq.

Ai, gjatë një bashkëbisedimi për KosovaPress, ka pranuar prezencën dhe veprimtarinë e grupeve kriminale në atë pjesë, për të cilat tha se janë zhvilluar përmes Listës Serbe.

Kërstiq foli edhe për kadetët serbë të sapo rekrutuar në Policinë e Kosovës të cilët dhanë dorëheqje, duke thënë se ata ishin projekt i izoluar dhe jashtë kontrollit të kryetarit të Serbisë  dhe Listës Serbe.

“Shantazhimi (ndaj qytetarëve serbë në veri) vjen drejtpërdrejt nga BIA dhe kabineti i kryetarit të Serbisë.  Që do të thotë se tani kemi një shantazhim dhe presion tjetër kundër atyre të cilët janë të gatshëm ta pranojnë pavarësinë e shtetit të Kosovës dhe të cilët janë të gatshëm të aplikojnë për formimin e partive politike brenda shtetit të Kosovës. Ata janë tani target nga Lista Serbe edhe nga kryetari i Serbisë”, ka thënë Kërstiq.

Edhe drejtori i Policisë për rajonin e veriut, Veton Elshani, tha se rreziku sa i përket kërcënimeve ndaj policëve serbë vjen nga Serbia dhe grupet e sponzorizuara nga ky shtet.

Sipas tij, ky është një problem i cili duhet zgjidhur në rrafshin politik më shumë,  sesa në rrafshin operacional në terren.

Ai, për shkak të zhvillimeve të fundit policore dhe politike, nuk ka dashur të përmend shifra të sakta të policëve të rinj serbë që kanë dhënë së fundi dorëheqje.

“Ne konsiderojmë se në veri të vendit ka grupe kriminale dhe ka njerëz të cilët merren me kriminalitet, me vepra penale të cilat janë të dënueshme sipas ligjit të Kosovës.  Ne jemi duke u marrë me ta… Rreziku dhe kërcënimet që ju bëhen kolegëve tonë nuk vijnë nga veriu, por vijnë nga Serbia dhe grupet atje të cilat janë të sponzorizuara nga shteti. Janë institucionet shtetërore të cilat i bëjnë këto kërcënime…”, sqaroi Elshani.

Ndërsa, Aleksandar Arsenijeviq, lider i Iniciativës qytetare ‘Mbijetesa serbe’ në veri të Mitrovicës, tha se kadetët e dorëhequr  kanë aplikuar përvojën e mëhershme të bashkëkombësve të tyre të cilët kanë dalë nga institucione të caktuara të Kosovës, për të marrë kompensim financiar nga Serbia.

Në këtë mënyrë, shtoi ai, këta kadetët policorë tashmë kanë kontrata me shtetin e Serbisë, përmes të cilave marrin paga nga Beogradi dhe nuk detyrohen të punojnë.

Në anën tjetër, Bashkimi Evropian ka shprehur shqetësimin për dorëheqjen e policëve të rinj serbë, duke dënuar ashpër kërcënimet ndaj këtyre pjesëtarëve të policisë, dhe duke kërkuar ndaljen e menjëhershme të tyre.

“Sulmet e vazhdueshme në shkallë të vogël nga grupet kriminale dhe frikësimi i kadetëve serbë të sapo rekrutuar në policinë e Kosovës, si dhe kërcënimet ndaj popullatës lokale, janë të papranueshme dhe duhet të ndalen menjëherë”, thuhet mes tjerash në deklaratën e  BE-së.

Ndryshe, që nga paslufta, në veri të vendit grupet kriminale janë zhvilluar në mënyrë të pakontrolluar, për shkak se me përfundimin e luftës, nuk morën fund edhe tensionet në atë pjesë. Sa herë që institucionet e Kosovës merrnin ndonjë vendim për shtrirjen e sovranitetit atje, shfaqeshin këto grupe të cilat financoheshin nga Beogradi zyrtar. ‘Cuvari Mosta’, ‘Civilna Zastita’, ‘Delije’, ‘Bradonje’ dhe të tjera, janë vetëm disa nga këto grupe ku janë përfshirë struktura të niveleve të larta të Serbisë, disa prej të cilëve janë të sanksinouar nga Shtetet e Bashkuara të Amerikës. Se këto grupe kriminale janë akoma prezente dhe veriu i Kosovës mbetet burim i paqëndrueshmërisë, e dëshmuan edhe ngjarjet e majit të këtij viti, ku pikërisht këto grupe sulmuan policët, ushtarët e KFOR-it dhe gazetarët, dhe situata sa nuk eskaloi në një konflikt të ri. Ndërsa Qeveria e Kosovës ka shpallë dy prej këtyre grupeve, ‘Civilna Zastita’ dhe ‘Severna Brigada’ organizata terroriste. /kp/

Rruga Press