Polonia rrëzon katër monumente të epokës sovjetike në mes të luftës në Ukrainë
Polonia ka çmontuar katër monumente të epokës komuniste në kuadrin e përpjekjes së ripërtërirë për të theksuar mosmiratimin e saj ndaj pushtimit rus të Ukrainës.
Monumentet, kryesisht obeliskë betoni, u ngritën në vitin 1945 për të përkujtuar ushtarët e Ushtrisë së Kuqe që ranë ndërsa luftonin kundër trupave naziste gjermane.
Punëtorët përdorën pajisje të rënda për të shkatërruar monumentet në katër vende të ndryshme në të gjithë Poloninë të enjten.
Polonia ka nisur t’i heqë simbolet e dominimit të Moskës pas Luftës së Dytë Botërore, në mes të luftës në Ukrainë.
Kreu i institutit historik shtetëror, Karol Nawrocki, pretendon se monumentet përfaqësonin një sistem që ishte fajtor për skllavërimin dhe vrasjen e popullit të vet dhe kombeve të tjera, duke përfshirë polakët.
“Ky është një monument turpi, një monument përbuzjeje i fituesve ndaj viktimave,” tha Nawrocki, duke folur në qytetin jugor të Glubczyce.
“Në vitin 1945 sovjetikët nuk sollën çlirimin, ata sollën një tjetër robëri,” shtoi ai. “Ata po e pushtonin Poloninë dhe po e trajtonin atë si plaçkë.”
Monumente të tjera ishin hequr nga vendet e mëparshme të varrimit në Byczyna dhe në Bobolice. Eshtrat e ushtarëve ishin zhvarrosur dhe u zhvendosën në varret e duhura në vitet 1950.
Një monument guri u shemb gjithashtu në pyll pranë Staszoë, në jug të Polonisë.
Nawrocki theksoi se ligji rus ndjek penalisht dhe parashikon deri në tre vjet burg për këdo që heq monumentet e ushtrisë sovjetike, madje edhe në shtetet e huaja.
Që kur Polonia e rrëzoi komunizmin në vitin 1989, vendi ka ndërmarrë hapa për të zhdukur simbolet e dominimit të Moskës nga hapësirat e saj publike, duke hequr monumentet dhe pllakatat dhe duke përjashtuar varrezat apo vendet e varrimit. Disa janë zhvendosur në ruajtje speciale.
Polonia e ka mbështetur Ukrainën kundër Rusisë politikisht, ushtarakisht dhe ekonomikisht dhe ka pranuar rreth 1.4 milionë refugjatë ukrainas.