Pezullohet drejtori i Policisë në veri të Kosovës, Nenad Gjuriq

Ushtruesi i detyrës së Drejtorit të Policisë së Kosovës, Fehmi Hoti, ka marr vendim për pezullimin e Drejtorit Rajonal të veriut të Mitrovicës, Nenad Gjuriq.

Burime brenda Policisë së Kosovës kanë bërë të ditur se Hoti ka marr vendim për pezullimin e Gjuriqit dhe se vendimi është duke iu dërguar.

Arsyet e pezullimit janë “mosbindje” dhe “thirrje për mosbindje dhe mbështetje për rezistencën”

Pezullimi i tij është rekomanduar nga Inspektorati Policor i Kosovës në drejtim të Policisë së Kosovës.

Drejtori Rajonal i Policisë së Kosovës në veri të Mitrovicës dyshohet se ka kryer veprat penale “Sabotim” dhe “Thirrje për rezistencë”, thuhet në njoftimin e IPK-së.

Gjuriq të mërkurën ka thënë se policia në atë pjesë të Kosovës nuk do ta zbatojë vendimin e Qeverisë për shpërndarjen e fletave qortuese për vozitësit e veturave me targa ilegale, sepse ai vendim është “politik dhe drejtuar kundër komunitetit serb”.

Krahas hetimit penal, inspektorati ka thënë se do të shikohet edhe përgjegjësia administrative.

“Andaj, duke marrë për bazë dyshimin për veprat penale në hetimin e këtij rasti, bazuar në autorizimet ligjore të IPK-së është rekomanduar suspendimi i të njëjtit. Veprimet tjera hetimore do të ndërmerren nga hetuesit e IPK-së në koordinim të plotë me Prokurorinë e Shtetit”.

Rruga Press