Përurohet çerdhja e re në Skënderaj

Në Skenderaj është inauguruar çerdhja e re me investim prej 1.2 milionë euro i Bashkimit Evropian. Në ceremoninë e hapjes morën pjesë kryeministri në detyrë, Albin Kurti dhe ministrja në detyrë e Arsimit, Arbërie Nagavci.

Kurti e vlerësoi këtë investim si një hap të rëndësishëm drejt përmirësimit të infrastrukturës arsimore dhe mbështetjes së edukimit të hershëm në Kosovë.

“Çerdhja e re është dëshmi se fëmijët janë në qendër të veprimeve tona politike. Edukimi është strategjia jonë prioritare në qeverisje. Vetëm në Komunën e Skenderajt, gjatë mandatit tonë, kemi realizuar investime që kapin vlerën prej 3.2 milionë eurosh”, tha Kurti.

Nagavci theksoi rëndësinë e përmirësimit të infrastrukturës arsimore në këtë komunë, duke bërë të ditur se kjo çerdhe është njëra nga gjashtë që janë ndërtuar me mbështetje të BE-së në Kosovë.

“Çerdhja e re, me një hapësirë prej 1,600 m², do të ofrojë kushte të përshtatshme për zhvillimin e aktiviteteve të ndryshme edukative për fëmijët”, tha Nagavci.

I pranishëm në këtë ngjarje ishte edhe ambasadori i Bashkimit Evropian në Kosovë, Aivo Orav, i cili theksoi përkushtimin e BE-së për investime në arsim dhe të ardhmen e fëmijëve kosovarë.

“Kjo çerdhe nuk është thjesht një objekt, por një hapësirë për të ardhmen e fëmijëve. BE ka investuar mbi 70 milionë euro në përmirësimin e infrastrukturës arsimore në Kosovë. Jemi të lumtur që do të investohet edhe në gjashtë çerdhe të tjera në komunat e Kosovës, përfshirë edhe Skenderajn. Kjo çerdhe do të ketë kapacitet për 120 fëmijë”, tha Orav.

Kryetari i Skenderajt, Fadil Nura, u shpreh mirënjohës për këtë investim, duke theksuar se është një shembull i partneritetit të sinqertë ndërmjet Kosovës dhe Bashkimit Evropian.

“Kjo çerdhe nuk është vetëm një ndërtesë, por simbol i përkujdesjes për të ardhmen tonë. Është dëshmi e qartë se edukimi nuk është luks, por e drejtë themelore për çdo qytetar. Përmes këtij investimi, fëmijët tanë do të rriten në kushte shumë më të mira” , tha Nura.

Çerdhja e re ndodhet në lagjen nr. 1 të qytetit të Skenderajt, në rrugën “Fazli Grajçevci”.

Rruga Press