Paketa Fiskale 2027, edhe bizneset gjermane kundër rritjes së taksave në Shqipëri
Shoqata Gjermane e Industrisë dhe Tregtisë në Shqipëri (DIHA) ka shprehur shqetësime për Paketën Fiskale 2027, duke paralajmëruar se rritja e taksave mbi biznesin dhe konsumin mund të ndikojë negativisht në investimet e huaja, konkurrueshmërinë e ekonomisë dhe krijimin e vendeve të reja të punës.
DIHA kërkon rishikimin e disa masave, konsultim të plotë me biznesin dhe periudha tranzitore për zbatimin e ndryshimeve fiskale.
Në një deklaratë publike të datës 5 nëntor 2026, DIHA, e cila përfaqëson interesat e investitorëve gjermanë dhe kompanive anëtare në Shqipëri, thekson se qëndrueshmëria dhe parashikueshmëria e politikave tatimore janë ndër faktorët kryesorë që ndikojnë në vendimet për investime afatgjata.
Sipas shoqatës, Paketa Fiskale 2027 përmban disa masa pozitive për familjet dhe punonjësit, por një pjesë e lehtësimeve financohen përmes rritjes së barrës tatimore mbi bizneset, duke krijuar rreziqe për aktivitetin ekonomik dhe tërheqjen e investimeve të reja.
DIHA kritikon mungesën e konsultimit publik: Bizneset nuk u përfshinë në hartimin e paketës
Një nga shqetësimet kryesore të ngritura nga DIHA lidhet me mënyrën e hartimit të Paketës Fiskale 2027.
Shoqata shpreh keqardhjen që komuniteti i biznesit nuk është përfshirë në fazat e përgatitjes së ndryshimeve, ndërsa projektligjet nuk janë publikuar për konsultim publik, sipas kërkesave të legjislacionit përkatës.
Sipas DIHA-s, tekstet përfundimtare iu paraqitën Këshillit Tatimor vetëm pak kohë përpara dorëzimit të tyre në Parlament, duke kufizuar mundësinë e bizneseve për të analizuar ndikimet dhe për të propozuar ndryshime.
Duke qenë se masat parashikohen të hyjnë në fuqi më 1 janar 2027, kompanitë do të kenë një periudhë të shkurtër për të përshtatur kontratat, sistemet financiare, buxhetet dhe planet e investimeve.
DIHA thekson se për investitorët gjermanë, të cilët planifikojnë aktivitetin në horizonte afatgjata, ndryshimet e papritura të politikave tatimore mund të ndikojnë drejtpërdrejt në vendimmarrjen për investime.
Tatimi mbi fitimin nuk rritet, por DIHA kundërshton dispozitat e pakonsultuara për huatë e ortakëve
Shoqata vlerëson pozitivisht faktin që projektpaketa e dorëzuar në Parlament ka marrë parasysh kërkesën e përfaqësuesit të DIHA-s në Këshillin Tatimor për të mos rritur normën e tatimit mbi fitimin e korporatave.
Sipas saj, ky zhvillim dëshmon rëndësinë e dialogut ndërmjet qeverisë dhe komunitetit të biznesit.
Megjithatë, DIHA evidenton se në projektpaketë janë përfshirë edhe dispozita që nuk kanë kaluar në konsultim, veçanërisht trajtimi i huave ndaj ortakëve apo aksionarëve si dividendë të konsideruar.
Kjo masë mund të ketë ndikim të drejtpërdrejtë në financimin e përditshëm të kompanive, veçanërisht në grupet e shoqërive tregtare dhe bizneset familjare, ku marrëdhëniet financiare ndërmjet kompanisë dhe ortakëve janë pjesë e funksionimit të aktivitetit.
DIHA kërkon që edhe këto dispozita t’i nënshtrohen një diskutimi të hapur përpara miratimit përfundimtar.
Rritja e tatimit mbi dividendët mund të largojë investimet drejt vendeve fqinje
Një nga kundërshtimet më të forta të DIHA-s lidhet me rritjen e propozuar të tatimit mbi dividendët.
Sipas shoqatës, kjo masë ul atraktivitetin e Shqipërisë për investimet në kapital dhe mund të dobësojë pozicionin konkurrues të vendit kundrejt ekonomive të tjera të Ballkanit Perëndimor.
Shqipëria konkurron me vendet e rajonit për të tërhequr investime të huaja, veçanërisht në sektorin industrial, ku vendimet për investime ndikohen nga kostot e prodhimit, infrastruktura dhe trajtimi fiskal i fitimeve.
DIHA paralajmëron se rritja e tatimit mbi dividendët mund të kufizojë burimet financiare që kompanitë kanë në dispozicion për riinvestime, modernizimin e teknologjisë dhe zgjerimin e aktivitetit.
Kjo mund të ndikojë edhe në krijimin e vendeve të reja të punës, si dhe në integrimin e furnizuesve shqiptarë në zinxhirët gjermanë dhe ndërkombëtarë të prodhimit.
TVSH 21%, rrezik për rritjen e çmimeve dhe dobësimin e efektit të lehtësimeve për familjet
DIHA shpreh shqetësim edhe për propozimin që norma standarde e TVSH-së të rritet në 21%.
Sipas shoqatës, një rritje e tillë ka gjasa të reflektohet në çmimet e konsumit, duke zbehur pjesërisht përfitimin që familjet pritet të marrin nga ulja e TVSH-së për produktet ushqimore bazë.
Ndërkohë, DIHA e konsideron uljen e TVSH-së për ushqimet bazë një masë të rëndësishme sociale, por thekson se efekti i saj real do të varet nga përcjellja e uljes së tatimit në çmimet përfundimtare që paguajnë konsumatorët.
Shoqata mirëpret gjithashtu uljen e tatimit mbi të ardhurat për shtresën e mesme, duke vlerësuar se kjo mund t’i ndihmojë kompanitë të mbajnë në Shqipëri punonjësit e kualifikuar.
Një tjetër masë e vlerësuar pozitivisht është eliminimi i dorëzimit të dyfishtë të pasqyrave financiare, që pritet të reduktojë burokracinë dhe kostot administrative të bizneseve.
Turizmi dhe bizneset e vogla, përballë kostove shtesë
Ndryshimet e propozuara në TVSH për shërbimet turistike dhe ulja e pragut të regjistrimit për TVSH-në janë dy masa të tjera që, sipas DIHA-s, mund të krijojnë vështirësi për bizneset.
Shoqata vlerëson se rritja e TVSH-së në turizëm do të shtojë kostot për një sektor të rëndësishëm të eksporteve shqiptare, ndërsa ulja e pragut të regjistrimit do të përfshijë në sistemin e TVSH-së shumë biznese të vogla që nuk janë ende të përgatitura për ndryshimin.
Përveç kostove administrative dhe financiare, këto masa mund të ndikojnë në konkurrueshmërinë e furnizuesve shqiptarë.
DIHA thekson se shumë prej kompanive anëtare janë pjesë e zinxhirëve ndërkombëtarë të furnizimit, përfshirë tregun gjerman, ku konkurrenca për çmimin dhe cilësinë është e lartë.
Shtimi i kostove mund të dobësojë aftësinë e këtyre kompanive për të konkurruar dhe për të zgjeruar bashkëpunimin me partnerët ndërkombëtarë.
DIHA propozon TVSH më të ulët për energjinë elektrike
Përtej kundërshtimeve ndaj rritjes së taksave, DIHA propozon edhe masa alternative që synojnë të mbështesin ekonominë dhe tranzicionin e gjelbër.
Një nga propozimet kryesore është aplikimi i një norme të reduktuar të TVSH-së për energjinë elektrike, në vend të rritjes së normës standarde në 21%.
Shoqata argumenton se energjia elektrike në Shqipëri prodhohet pothuajse tërësisht nga burime të rinovueshme dhe se legjislacioni europian lejon aplikimin e normave të reduktuara të TVSH-së për këtë produkt.
Sipas DIHA-s, një politikë e tillë do të sillte përfitime të drejtpërdrejta për familjet, duke ulur faturat e energjisë, por edhe për bizneset, të cilat përballen me kostot e energjisë si një komponent të rëndësishëm të aktivitetit ekonomik.
Shoqata e lidh këtë propozim me objektivat e Marrëveshjes së Gjelbër Europiane dhe Agjendës së Gjelbër për Ballkanin Perëndimor.
Automjetet elektrike të përjashtohen plotësisht nga taksa vjetore
Një tjetër propozim i DIHA-s lidhet me reformën e taksimit të automjeteve, që parashikon heqjen e taksës së qarkullimit dhe transferimin e barrës së saj te taksa vjetore e mjeteve.
Shoqata kërkon që automjetet elektrike të përjashtohen plotësisht nga pagesa e taksës vjetore.
Sipas saj, kjo masë do të nxiste përdorimin e mjeteve me emetime zero dhe do të ishte në përputhje me angazhimet e Shqipërisë për dekarbonizimin e transportit.
DIHA argumenton se politikat fiskale duhet të përdoren edhe si instrumente për të nxitur investimet dhe konsumin e qëndrueshëm, në përputhje me procesin e integrimit europian.
Thirrje Qeverisë dhe Parlamentit: Rishikoni afatet dhe konsultoni biznesin përpara miratimit
Në përfundim të deklaratës, Shoqata Gjermane e Industrisë dhe Tregtisë i kërkon Qeverisë dhe Parlamentit të zhvillojnë një proces të plotë konsultimi për Paketën Fiskale 2027 përpara miratimit të saj.
DIHA kërkon rishikimin e afateve të hyrjes në fuqi të rritjeve tatimore dhe dispozitave që nuk janë konsultuar, si dhe vendosjen e një periudhe të arsyeshme tranzitore për bizneset.
Sipas shoqatës, një politikë fiskale e qëndrueshme dhe e parashikueshme është thelbësore për ruajtjen e investimeve ekzistuese dhe tërheqjen e kapitalit të ri të huaj. /ekofin.al
Rruga Press