OKB-ja bën thirrje të ndalet tragjedia: Mbi 4 milionë ukrainas e kanë lëshuar vendin

Agjencia e Kombeve të Bashkuara për refugjatët,UNHCR ka bërë të ditur të premten se nga Ukraina janë larguar 4.1 milionë refugjatë.

Agjencia ka treguar se sipas të dhënave të fundit, 4.102.876 ukrainas e kanë lëshuar vendin e tyre që nga 24 shkurti kur ka nisur pushtimi rus i Ukrainës, teksa 90% e tyre janë gra dhe fëmijë, raporton Sky News.

“Të detyruar të ikin për jetët e tyre. Të detyruar të lënë shtëpitë. Të detyruar të ndahen nga familjarët. Kjo tragjedi duhet të ndalet”, ka thënë UNHCR-ja.

Kërkesa e agjencisë së OKB-së vjen pak pasi autoritetet në Kiev kanë deklaruar se të paktën 148 fëmijë janë vrarë nga raketat ruse, që kur ka nisur pushtimi i Ukrainës.

Ministria ukrainase e Mbrojtjes ka njoftuar se deri tani Rusia ka lëshuar mbi Ukrainë 1.370 raketa të cilat kanë shkatërruar 15 aeroporte në të gjithë vendin.

Rruga Press