Nëse revolucioni i Abdixhikut është shkëputja e Kosovës nga Shqipëria, atëherë traditën politike të kësaj e gjen vetëm tek nomenklatura titiste

Nga Donik Sallova

Abdixhiku edhe pretendon se është konservator, i djathtë, edhe i pengon nacionalizmi, i pengon pan-shqiptarja, identiteti i vjetër shqiptar i Kosovës, historia e luftës për bashkim nga Isa Boletini te Adem Jashari, etj. Të jesh konservator, do të thotë ta restaurosh e konservosh të vjetrën (vlerën, idenë, idealin, identitetin) dhe ta kesh atë udhërrëfyes të aksionit politik në kohë të reja.

Po synove ta përmbysësh e ta ndryshosh të vjetrën, të heqësh dorë prej saj si diçka e keqe, të konvertohesh në bindje të reja (p.sh. të besosh se shteti i Kosovës i ka rrënjët veç te Ahtisaari), atëherë nuk je konservator, por je “revolucionar”. Nëse ky është revolucioni i Abdixhikut, pra shkëputja e Kosovës nga Shqipëria, atëherë për këtë gjë traditën politike e gjenë vetëm tek nomenklatura titiste, por jo tek ndonjë parti politike shqiptare. Nuk duhet të harrosh se e djathta moderne shqiptare gjenezën e ka tek Balli Kombëtar, pra te lufta për Shqipninë e Bashkuar.

Anatemimi që LDK-ja mustafiane të cilën e udhëheq Abdixhiku ua bën veprimtarëve të VV-së të cilët kanë origjinë ose jetojnë në Republikën e Shqipërisë (Shqipninë Londineze -1913), tregon se kjo parti po distancohet nga rrënjët e të qenit parti e lëvizje shqiptare.

Abdixhiku është i ri në politikë e në LDK dhe nuk e di se Ibrahim Rugova, si president i Kosovës, në vitin 2003, i ka shpallur heronj të Kosovës me dekret (si akt politik) të gjithë pjestarët e Lidhjes Shqiptare të Prizrenit (organizatës bërthamë të nacionalizmit shqiptar).

Prandaj, Abdixhiku që mos të duket paradoksal duhet të lexojë teori politike e historinë kombëtare. E djathta nuk është vetëm tregu, është para së gjithash është kombi dhe identiteti i tij historik.

Rruga Press