Në një vend normal qeveria do kishte rënë kur 15 njerëz u dogjën të gjallë në spitalin modular në Tetovë

Artan Dika shkruan rreth rënies së qeverisë në Maqedoninë e Veriut, duke ia faturuar këtë Bashkimit Demokratik për Integrim, duke theksuar poashtu se që prej ditës kur ra nën flakë Spitali Modular i Tetovës dhe në të u dogjën 15 persona, kjo qeveri i kishte ditët e numëruara.

Sipas tij, rënia e qeverisë që atë ditë do të kishte qenë evitim i sjelljes së qeverisë në mënyrë të papërgjegjshme dhe me shpërfillje.

Më poshtë reagimi i plotë i z. Dika, në llogarinë e tij në facebook:

Shkaktare për rënien e qeverisë me përbërjen e partive aktuale është bërë BDI-ja. Pas mbarimit të zgjedhjeve, të gjitha partitë qeverisëse u shprehën se duan që të vazhdojë puna e qeverisë me partitë aktuale.

Ishte vendimi i KSHZ-së, që pa asnjë arsye serioze të përsëriten zgjedhjet në Komunën e Zhelinës ku fitoi Lëvizja Besa, shkëndija që shpërtheu pakënaqësinë e këtij subjekti dhe solli vendimin për të dalë nga qeveria.

Nuk është hera e parë që LSDM-ja bie pre e apetiteve dhe mendjemadhësisë së BDI-së për të provokuar partitë tjera. Katër vite më parë pothuajse e njëjta gjë kishte ndodhur me Aleancën për Shqiptarët, e cila u përjashtua nga qeveria për shkak të koalicionimit në zgjedhjet lokale me Lëvizjen Besa. Në atë rast, me insistimin e BDI-së, LSDM-ja pasi e kishte stabilizuar pushtetin e saj, ja mori ASH-së ministrinë e shëndetësisë duke i bërë asaj një ofertë poshtëruese.

Ajo i ofroi ASH-së një ministri pa peshë që mbeti e njohur si ministria e byrekut (gjë që ASH-ja nuk mund ta gëlltiste), me qëllimin e largimit të saj nga qeveria. Kësaj radhe Lëvizja Besa u tregua më e shkathët ndaj provokimit arrogant të BDI-së dhe mbështetjes së LSDM-së për rivotim në Zhelinë. Ajo e kuptoi peshën e saj dhe të momentit konkret dhe u largua nga Qeveria që e mbante në këmbë, duke i nxjerrë me këtë potez jashtë loje të dy partitë tjera, LSDM dhe BDI, pa lejuar të poshtërohet. Në një lloj mënyrë Lëvizja Besa “mori hakun” e ASH-së nga LSDM-ja dhe BDI-ja, për atë që ndodhi 4 vite më parë.

Në një vend normal kjo qeveri do të kishte rënë vet që në 8 shtator, kur 15 njerëz u dogjën të gjallë në atë që do duhej të ishte spital modular në Tetovë dhe si pushteti lokal ashtu edhe qeveria u sollën me shpërfillje dhe papërgjegjësi ndaj asaj që ndodhi. Prej asaj ditë kjo qeveri ishte e nemur … dhe ditët e saj të numëruara.

Rruga Press