Murati: Me deklarata LDK-ja e kërkon votën e diasporës, ama me vepra po shihet që po bën çmos që ta pengojë

Hekuran Murati ka reaguar ndaj vendimit të PZAP-it, i cili ka miratuar ankesën e LDK-së për anulimin e hapësirave shtesë të votimit për diasporën. Përmes një postimi në Facebook, Murati ka thënë se LDK-ja po e tregon haptas kundërshtimin ndaj diasporës, ndonëse publikisht pretendon se kërkon mbështetjen e saj.

Sipas tij, MPJD kishte propozuar hapjen e qendrave alternative të votimit jashtë ambasadave dhe konsullatave, me qëllim që votimi të ishte më i lehtë dhe më i afërt për mërgimtarët. Por LDK, siç thotë ai, ka bërë gjithçka për ta kundërshtuar këtë lehtësim.

“LDK me deklarata e kërkon votën e diasporës, ama me vepra po shihet që po bën çmos që ta pengojë,” ka shkruar Murati, duke e quajtur ankesën e tyre një goditje direkte ndaj të drejtës së mërgatës për pjesëmarrje në zgjedhje.

PZAP ndërkohë ka miratuar ankesën e LDK-së, duke vendosur që qendrat alternative të votimit jashtë vendit të anulohen dhe që procesi të zhvillohet vetëm nëpër ambasada dhe konsullata.

Murati ka paralajmëruar se ky vendim i dëmton drejtpërdrejt mijëra qytetarë që jetojnë jashtë Kosovës dhe që tashmë do të kenë më të vështirë ushtrimin e së drejtës së votës.

Rruga Press