Maqedonci: Përmes intervenimit në Kosovë, NATO përmbushi qëllimin e ekzistencës si aleancë

Ministri i Mbrojtjes, Ejup Maqedonci, në 26 vjetorin e intervenimit të NATO-s në Kosovë, ka thënë se në këtë datë të rëndësishme, përkujtojnë një moment historik që shënoi kthesën e madhe në rrugëtimin e Kosovës drejt lirisë dhe pavarësisë.

Sipas tij, 24 marsi i vitit 1999 mbetet një kujtim i paharrueshëm për të gjithë ata që besuan dhe luftuan për një të ardhme më të mirë, ndërsa ndërhyrja vendimtare e NATO-s, shënoi një akt të rëndësishëm të mbështetjes ndërkombëtare ndaj Kosovës.

“Rezistenca e UÇK-së dhe intervenimi i NATO-s, 26 vite më parë, ishte e vetmja formë që arriti t’i jepte fund spastrimit etnik të Kosovës, të ndërpriste vrasjet e fëmijëve, grave, burrave e të moshuarve, dhunimet sistematike, përndjekjet, djegiet e dëbimet me dhunë dhe me forcë, prandaj 24 marsi është rreshtim jo vetëm me popullin e Kosovën por rreshtim edhe me anën e duhur të historisë së njerëzimit si veprim në mbështetje të vlerave të civilizimit perëndimor, paqes, lirisë dhe demokracisë”, shkroi ai.

Sipas tij, përmes këtij intervenimi, NATO përmbushi qëllimin e ekzistencës si aleancë.

“U jemi mirënjohës gjithmonë liderëve botëror dhe shteteve të përfshira të cilët përdorën diplomacinë për të shpëtuar njerëzimin. Si aleanca më e qëndrueshme dhe më e suksesshme në histori, Kosova është e përkushtuar të thellojë bashkëpunimin dhe angazhimin për t’iu bashkuar NATO-s”, tha Maqedonci.

Rruga Press