“Kush menon si Xhevdeti, vepron si Dardani”/ Muret në Prishtinë mbushen me grafite kundër analistit pas deklaratës për vajzat dhe Audi-n

Pas statusit të analistit Xhevdet Pozhari lidhur me vrasjen e 18-vjeçares në Ferizaj, dikush ka vendosur një grafit që e barazon mendimin e këtij të fundit me veprën e të dyshuarit për vrasjen e të ndjerës.

Në grafit shkruhet “Kush menon si Xhevdeti, vepron si Dardani“. Muralet janë të shkruara tek objekti i Ministrisë së Kulturës, Rinisë dhe Sportit në Prishtinë.

Marigona Osmani u gjet e vdekur dy ditë më parë në derën e spitalit në Ferizaj ku u hodh nga i dashuri i saj, Dardan Krivaqa dhe miku i tij, Arbër Sejdiu. E reja kishte ndërruar jetë si pasojë e dhunës makabre që ishte ushtruar mbi të. Sejdiu është vënë në pranga, ndërsa Krivaqa është shpallur në kërkim.

Lidhur me këtë rast analisti Xhevdet Pozhari bëri një status ku u bënte thirrje vajzave që të mos shikonin makinat, por personin brenda tyre.

Statusi i mëparshëm i Pozharit:

E vërtetë se ne duhet të angazhohemi shumë për edukimin e djemve në këtë shoqëri, veçanërisht për respektin ndaj gjinisë femërore dhe t’i shembim stereotipet patriarkale.Por, po aq e rëndësishme është që edhe vajzave duhet rikujtuar sa më shpesh se nuk është me rëndësi vetura Audi A8, por gomari që e nget atë.

Rruga Press