Kurti takoi ambasadorin e Finlandës, flasin për mundësitë për investime në Kosovë

Kryeministri i Kosovës, Albin Kurti ka pritur në takim ambasadorin e Finlandës në Kosovë, Matti Nissinen, të hënën më 23.09.2024.

Sipas Zyrës së Kryeministrit, takimi i sotëm është përqendruar rreth vizitës që ministrja e Punëve të Jashtme të Finlandës, Elina Valtonen kishte në Kosovë më 05.09.2024.

“Si vazhdimësi e takimit të 5 shtatorit, kryeministri dhe ambasadori Nissinen folën për përgatitjen e nevojshme për realizimin e vizitës së një delegacioni të përfaqësuesve të bizneseve finlandeze për të hulumtuar mundësitë dhe avantazhet që vendi ynë ofron për investitorë të huaj” – thuhet në komunikatë.

Kurti citohet të ketë thënë se “ka qenë kënaqësi ta mirëprisnin Ministren Valtonen për të folur për marrëdhëniet dypalëshe, e çështjet me interes ne veçanti për fushën e tregtisë dhe mbrojtjes.”

“Kryeministri ka falënderuar ambasadorin Nissinen për bashkëpunimin e ngushtë e për mbështetjen e vazhdueshme dhe të rëndësishme të Finlandës ndaj Kosovës, si në anëtarësimin e saj në organizata ndërkombëtare ashtu edhe në zhvillimin e brendshëm institucional dhe shoqëror”- thuhet në komunikatë.

Rruga Press