Kurti merr pjesë në hapjen e bazës operative të Wizz Air në Aeroportin Ndërkombëtar të Prishtinës

Aeroporti Ndërkombëtar i Prishtinës “Adem Jashari” dhe Wizz Air kanë organizuar ceremoninë zyrtare të hapjes së bazës operative të Wizz Air në Aeroportin Ndërkombëtar të Prishtinës.

Kryeministri në detyrë i Kosovës, Albin Kurti ka përgëzuar vendosjen e bazës së kompanisë ajrore Wizz Air në Kosovë.

Ai ka thënë se pikërisht në ditën kur Gjykata Ndërkombëtare e Drejtësisë ka konfirmuar shpalljen e pavarësisë së Kosovës para 16 vjetësh, vjen ky lajm i mirë për vendin.

Sipas tij, vendimi i Wizz Air për të vendosur bazën e saj në Aeroportin Ndërkombëtar të Prishtinës është dëshmi se Kosova po shihet gjithnjë e më shumë si vend i besueshëm për investime

“Sot, teksa shënojmë 16-vjetorin e opinionit të Gjykatës Ndërkombëtare të Drejtësisë, i cili konfirmoi se shpallja e pavarësisë së Kosovës nuk ishte në kundërshtim me të drejtën ndërkombëtare, jemi mbledhur për një lajm tjetër të mirë për shtetin tonë.
Vendimi i Wizz Air për të vendosur bazën e saj në Aeroportin Ndërkombëtar të Prishtinës është dëshmi se Kosova po shihet gjithnjë e më shumë si vend i besueshëm për investime, me perspektivë të qartë zhvillimi, si dhe me potencial të madh për t’u integruar edhe më shumë në rrjetet evropiane të transportit, të tregtisë dhe të lëvizjes së lirë të njerëzve.

Kjo bazë e re dhe aeroplani i ri Airbus A321neo, me kapacitet prej 239 ulësesh, janë investim i rëndësishëm dhe tregues se vendi ynë po bëhet gjithnjë e më tërheqës edhe për industrinë ndërkombëtare të aviacionit.

Suksesi i këtillë nuk ka ardhur rastësisht, ai është rezultat i një pune të përbashkët, i përkushtimit institucional, i bashkëpunimit të ngushtë me operatorët ekonomikë e me partnerët tanë ndërkombëtarë, i shtimit të numrit të pasagjerëve, si dhe i qeverisjes së mirë që ka ngjallur dhe po e rrit besimin në potencialin që shteti ynë ka”, tha ai.

“Sektori i aviacionit, përveçse transport, është edhe infrastrukturë për zhvillim. Çdo linjë e re ajrore krijon mundësi e ura për lidhje të reja kulturore njerëzore, profesionale e turistike, ekonomike e tregtare. Në kontekstin rajonal viteve të fundit, aeroporti i Prishtinës është rritur me dinamikë të lartë. Numri i udhëtarëve ka shënuar vazhdimisht rekorde të reja. Kështu që edhe ky numri që e shihni në këtë tabelën nuk është më i vërtetë vlen, është 4.6 milionë, po i afrohemi ngadalë po sigurt edhe shifrës prej 5 milionë pasagjerë në aeroportin ndërkombëtar të Prishtinës”, tha ai.

“E tash ne jemi të interesuar që numri i udhëtarëve i cili po rritet, gjithashtu të ketë edhe bileta sa më të lira, në mënyrë që qarkullimi të jetë sa më i përballueshëm. Kjo në përgjithësi është shenjë se qytetarët tanë udhëtojnë më shumë dhe mërgata jonë po e viziton më shpesh vendlindjen, por edhe se numri i turistëve po shtohet. Andaj është e domosdoshme që të kemi edhe në të ardhmen zhvillime e ngjarje sikurse kjo sot”, tha ai.

Rruga Press