Krizë e thellë e peshkimit në Durrës, sindikata kërkon rimbursimin e naftës nga qeveria

Sektori i peshkimit në Durrës është në një krizë të thellë për shkak të rritjes së çmimit të naftës në bursat ndërkombëtare dhe tregun shqiptar. Një ditë më parë greva e paralajmëruar e tyre bëri që shteti të ulë çmimin 400 lekë të vjetra nën çmimin e bursës, njofton SYRI TV. Sektori peshkimit  ishte gati të përfshihej në një grevë të përgjithshme, duke pezulluar daljet në det.

Kreu i sindikatës së peshkimit, Klodian Kapiti, deklaroi për mediat se aktualisht ky sektor furnizohet me naftë 1800 lekë/litër, shumë më i lartë sesa çmimi që përllogarit flota e peshkimit për të qenë eficente.

Sipas Kapitit, pas mbledhjes së djeshme mes Ministrisë së Financës dhe Bujqësisë është arritur marrëveshja që pas datës 1 korrik, peshkatarët të përfitojnë nga skema e rimbursmit të naftës me 400 lekë për litër sipas çmimit të përllogaritur nga Bordi i Transparencës.

Një rritje të ndjeshme ka pësuar çmimi i peshkut në treg në muajt e fundit, kjo dhe për shkak të rritjes së kërkesës për këtë produkt si pasojë e sezonit turistik. Për shumë nga speciet e detit, çmimi është dyfishuar, por për këtë Kapiti fajëson njësitë e tregtimit dhe restorantet.

Durrësi është qyteti me numrin më të madh të restoranteve të peshkut në shkallë vendi dhe është një industri e tërë që funksionon në shërbim të turizmit.

Rruga Press