Kosova pa tarifa doganore në tregjet e EFTA-s nga 1 tetori
Nga 01.10.2026 hyn në fuqi Marrëveshja e Tregtisë së Lirë ndërmjet Kosovës dhe vendeve të EFTA-s, e cila synon të krijojë mundësi të reja për eksportet, investimet dhe partneritetet ekonomike.
Ministria e Industrisë, Ndërmarrësisë, Tregtisë dhe Inovacionit (MINTI) ka organizuar një sesion informues me bizneset për t’i informuar ato për përmbajtjen e marrëveshjes dhe mundësitë që ajo krijon për ekonominë e Kosovës.
EFTA përfshin Islandën, Lihtenshtajnin, Norvegjinë dhe Zvicrën, tregje të cilat karakterizohen nga fuqi e lartë blerëse.Sipas MINTI-t, gjatë vitit 2025 Kosova eksportoi mbi 100.4 milionë euro mallra në vendet e EFTA-s, ndërsa importoi rreth 53 milionë euro, duke regjistruar një bilanc pozitiv tregtar prej 47.4 milionë eurosh.Nga vlera e përgjithshme e eksporteve në këto tregje, rreth 99.4 milionë euro ishin eksporte drejt Zvicrës.
Ministrja Kusari-Lila, ka thënë se këto të dhëna tregojnë se produktet kosovare tashmë kanë prani në tregjet e EFTA-s, ndërsa synimi është zgjerimi i tyre.“Kosova ka një bilanc të konsiderueshëm pozitiv, i cili në vitin 2023 arriti në rreth 2 miliardë e 370 milionë euro. Eksporti i shërbimeve përbën një nga avantazhet kryesore të Republikës sonë në tregtinë ndërkombëtare. Dhe paraqet gjithashtu potencial të rëndësishëm të rritjes më tutje.
Në këtë drejtim, vendet e EFTA-s dhe veçanërisht Zvicra, përbëjnë partnerë të rëndësishëm tregtarë për Kosovën në fushën e shërbimeve”- tha Kusari-Lila.Sipas saj, MINTI i ka dhënë prioritet procedimit të marrëveshjes për ratifikim, me qëllim të rritjes së pranisë së produkteve dhe shërbimeve kosovare në këto tregje.
Ambasadorja e Zvicrës në Kosovë, Anne Lise Cattin Hennin, e cilësoi marrëveshjen një hap të rëndësishëm në forcimin e marrëdhënieve ekonomike ndërmjet Kosovës dhe vendeve të EFTA-s.“Ne po shënojmë këtë arritje të rëndësishme në marrëdhëniet ekonomike midis Kosovës dhe vendeve të EFTA-s. Marrëveshja e Tregtisë së Lirë midis Kosovës dhe katër vendeve të EFTA-s — Zvicrës, Islandës, Lihtenshtajnit dhe Norvegjisë — do të hyjë në fuqi më 1 tetor, dhe kjo është një arritje shumë e rëndësishme”- tha ajo.Drejtori i Doganës së Kosovës, Agron Llugaliu tha se marrëveshja pritet të sjellë lehtësime në procedurat tregtare dhe mundësi të reja për bizneset eksportuese.“Nga perspektiva e jonë si doganë, sigurojmë se përfitimet e marrëveshjes mbështeten nga një administratë moderne, procedurat thjeshtohen dhe faktori njerëzor është i njëtrajtshëm me rregullat dhe procedurat sa i përket kualifikimit që ka kjo marrëveshje.
Përveç kësaj, ne si doganë, meqë lehtësimi i tregtisë konsiderohet një nga prioritetet tona kryesore, kemi bërë zhvillime në të gjitha fushat që mund të ndikojnë në lehtësimin e tregtisë”- tha ai.Marrëveshja nuk përfshin vetëm tregtinë e mallrave, por krijon mundësi edhe për tregtinë e shërbimeve, përfshirë teknologjinë e informacionit dhe komunikimit, shërbimet profesionale e biznesore, transportin dhe ndërtimin.
Në sesionin informues morën pjesë edhe ambasadorja e Zvicrës në Kosovë, Anne Lise Cattin Hennin, dhe drejtori i Përgjithshëm i Doganës së Kosovës, Agron Llugaliu.MINTI ka vlerësuar se bashkëpunimi ndërmjet institucioneve dhe komunikimi me bizneset janë të rëndësishme për shfrytëzimin e mundësive që ofron marrëveshja.Me hyrjen në fuqi të marrëveshjes, synohet rritja e eksporteve të produkteve “Made in Kosova”, krijimi i partneriteteve të reja dhe tërheqja e investimeve.Marrëveshja ofron mundësi të shumta – përfshirë për importimin dhe eksportimin e mallrave. Produktet me origjinë nga Kosova do të mund të eksportohen në vendet e EFTA-s dhe Kompanitë vendore nuk do të kenë nevojë që të paguajnë tarifë doganore për to.
Rruga Press