Kontrolli i Lartë i Shtetit kritika institucioneve përgjegjëse për menaxhimin e pandemisë në Shqipëri
Kontrolli i Lartë i Shtetit publikoi të enjten raportin përfundimtar mbi menaxhimin e situatës epidemiologjike nga COVID-19 në Shqipëri.
KLSH kritikon institucionet përgjegjëse për menaxhimin e pandemisë për problematika të theksuara, që nisin nga mungesa e kapaciteteve spitalore, fonde financiare të pamjaftueshme, mangësi në stokun e materialeve të mbrojtjes personale (MMP-ve), pamjaftueshmëri në trajnimet e stafit mjekësor, pasiguri në vendin e punës etj.
Puna e Ministrisë së Shëndetësisë nuk i shpëton kritikave të KLSH që sipas raportit nuk realizoi ofrimin e shërbimit shëndetësor si një e mirë publike.
Gjetjet kryesore
- Ministria e Shëndetësisë dhe Mbrojtjes Sociale nuk u koordinua me Planin Kombëtar të Emergjencave Civile për menaxhimin e pandemisë.
- Strategjisë Kombëtare të Shëndetësisë 2016-2020 i munguan planet konkrete të veprimi në nivel strategjik dhe operativ, objektiva dhe përshtatja për pandeminë.
- Operatori i Shërbimeve të Kujdesit Shëndetësor, nuk përcaktohet si strukturë kryesore përgjegjëse për shëndetin publik.
- Mjekët e familjes nuk janë angazhuar paralelisht me Urgjencën Kombëtare Mjekësore.
KLSH nënvijëzon se “vonesat në kohë lidhur me sistemin e lajmërimit mbi situatën shëndetësore jo të zakonshme të qytetarëve, numri i vogël i grupeve të terrenit dhe mbingarkesa e tyre, kanë ndikuar në shëndetin e pacientëve dhe bënë që procedurat e testimit në disa raste të mos kryheshin brenda afateve kohore të përcaktuara. Kontaktet në rritje me personat e infektuar si dhe ekspozimi ndaj virusit, përbënin një risk të lartë të infektimit të mjekëve në këto grupe, gjë e cila u shoqërua dhe me humbje jete të stafit mjekësor”.
Rruga Press