Konjufca i kërkon guvernatores së Iowas vazhdim të mbështetjes së SHBA-së në integrimin euroatlantik

Kryetari i Kuvendit, Glauk Konjufca, ka pritur të hënën në takim guvernatoren e shtetit të Iowas, Kim Reynolds, të cilës ia ka ritheksuar se integrimi euroatlantik i Kosovës është dhe mbetet prioritet i shtetit.

Kështu është bërë e ditur në komunikatën e lëshuar nga Kuvendi, ku më tej thuhet se Konjufca ka kërkuar vazhdim të mbështetjes së Shteteve të Bashkuara.

“Republika e Kosovës ka para vetes procese të rëndësishme drejt integrimeve euroatlantike dhe anëtarësimit në mekanizma e organizata ndërkombëtare. Në të gjitha këto procese presim vazhdimin e mbështetjes së fuqishme të Shteteve të Bashkuara dhe të gjithë partnerëve tanë”, ka thënë ai.

Reynolds nga ana tjetër, thuhet se ka shprehur kënaqësinë për marrëdhëniet e deritanishme midis dy vendeve dhe ka theksuar gatishmërinë për ta zgjeruar më tej bashkëpunimin në shumë fusha, përfshirë atë parlamentare.

Rruga Press