Japonia proteston ndaj vizitës së Putinit në ishujt Kuril/ Ministri i Jashtëm japonez: Territori na përket ne sipas së drejtës ndërkombëtare

Ministri i Jashtëm japonez, Toshimitsu Motegi, deklaroi se Tokio e konsideron këtë territor si pjesë të Japonisë, si historikisht ashtu edhe në bazë të së drejtës ndërkombëtare, duke theksuar se qeveria japoneze “proteston fuqishëm” ndaj vizitës së Putinit.

Ishujt, të njohur në Japoni si Territoret Veriore, administrohen nga Rusia dhe janë në qendër të një mosmarrëveshjeje territoriale që ka zgjatur për dekada. Çështja ka qenë një nga pengesat kryesore për nënshkrimin e një traktati paqeje mes Moskës dhe Tokios pas Luftës së Dytë Botërore.

Gjatë vizitës në Iturup, Putin u takua me banorë vendas dhe provoi produkte lokale, ndërsa mediat shtetërore ruse e paraqitën vizitën si pjesë të zhvillimit të rajonit.
Ishujt kanë gjithashtu rëndësi të madhe strategjike për Rusinë. Iturupi shërben si një nga bazat kryesore ajrore ushtarake ruse në këtë zonë.

Tensionet janë shtuar edhe për shkak të aktivitetit ushtarak. Muajin e kaluar, anije luftarake ruse dhe kineze zhvilluan një patrullim të përbashkët në ujërat pranë ishujve Kuril, ndërsa Rusia ka zhvilluar edhe më herët stërvitje ushtarake në zonë, veprime që kanë shkaktuar protesta nga Tokio.

Rruga Press