Italia voton sot Presidentin i ri/Pas ikjes së Berlusconit, Draghi më i avantazhuari

Sot në mesditë pritet të nisë raundi i parë i votimit për Presidentin e ri të Italisë, ku pas tërheqjes së Silvio Berlusconit, emri më i spikatur për momentin mbetet ai i Kryeministrit Mario Draghi. Sipas ekspertëve, rezultati i këtyre zgjedhjeve mund të shkaktojë një pasiguri të madhe në skenën politike vendase, sidomos edhe pas krizës së shkaktuar nga pandemia e koronavirusit.

Në një proces, i cili pritet të zgjasë disa ditë, më shumë se 1 mijë parlamentarë dhe përfaqësues rajonalë do të mblidhen sot në orën 14:00 për raundin e parë të votimit të fshehtë për të zëvendësuar Presidentin në largim Sergio Mattarella.

Sipas ligjit italian, fituesit do t’i duhen të paktën dy të tretat e shumicës në cilindo nga tre raundet e para, me një shumicë absolute të mjaftueshme më pas për të marrë kreun e drejtimit të shtetit. Meqenëse as qendra e djathtë dhe as e qendra e majtë nuk kanë vota të mjaftueshme për të imponuar një kandidat nga kampi i tyre, ka të ngjarë të nevojitet një kompromis për të parandaluar një ngërç.

Udhëheqësit e Lëvizjes 5-Yje dhe të Partisë Demokratike (PD) të qendrës së majtë thanë të dielën se ligjvënësit e tyre do të hedhin vota të zbrazëta, një mënyrë për të luajtur me kohën ndërsa vazhdojnë negociatat ndërpartiake. Berluskoni u tërhoq nga gara të shtunën. Qendra e majtë kishte përjashtuar mbështetjen e ish-Kryeministrit, i cili nuk kishte gjasa të merrte mbështetjen e gjerë të nevojshme tradicionalisht.

Sipas mediave italiane, nëse Draghi do të bëhej kreu i shtetit, do të nevojitej menjëherë një marrëveshje për një Kryeministër tjetër për të siguruar që destabiliteti të mos rrezikojë përpjekjet e Italisë për të marrë rreth 200 miliardë euro (226.80 miliardë dollarë) nga fondet e BE-së për lehtësimin e pandemisë.

Rruga Press