Ilir Alimehmeti dënon agresionin policor ndaj News24: Policia s’ka asnjë të drejtë të ndalojë gazetarët pa një arsye ligjore dhe të justifikuar

Kreu i Departamentit për Shëndetësinë në Partinë Demokratike dhe njëherazi kryetar i grupit të këshilltarëve të opozitës në Këshillin Bashkiak të Tiranës, Ilir Alimehmeti, ka reaguar pas ndërhyrjes së policisë së Shqipërisë në ambientet e televizionit News24.

“Liria e medias është themel i demokracisë. Media e pavarur luan një rol thelbësor në informimin e qytetarëve, në mbikëqyrjen e pushtetit dhe në nxitjen e debatit publik. Ndalimi ose frikësimi i gazetarëve nga policia e minon këtë funksion kritik”, theksoi Alimehmeti.

Ai kujtoi se Kushtetuta dhe ligji “njohin, mbrojnë dhe garantojnë lirinë e shprehjes dhe të shtypit” dhe se “policia nuk ka asnjë të drejtë të ndalojë gazetarët pa një arsye ligjore dhe të justifikuar”.

Sipas tij, çdo ndërhyrje e policisë për të penguar punën e gazetarëve shihet si “përpjekje për të fshehur të vërtetën ose për të mbrojtur interesa të caktuara”, gjë që dëmton besimin e qytetarëve si tek institucionet, ashtu edhe tek sistemi i drejtësisë.

Alimehmeti theksoi se ka mënyra ligjore për të adresuar çdo shkelje nga ana e gazetarëve, por veprimet policore duhet të jenë gjithmonë proporcionale dhe brenda kornizës ligjore.

“Media e lirë nuk është armike e shtetit. Ajo është aleate e transparencës dhe e llogaridhënies. Pengimi i saj nga policia është jo vetëm i gabuar, por edhe i rrezikshëm për shoqërinë”, përfundoi ai.

Rruga Press