Haxhiu në takim me kongresistët amerikanë theksoi rëndësinë e anëtarësimit të Kosovës në NATO

Ushtruesja e detyrës së presidentes së Kosovës, Albulena Haxhiu, ka pritur në takim kongresistin republikan Keith Self dhe kongresistin demokrat Suhas Subramanyam, të cilët po qëndrojnë në Kosovë si pjesë e një delegacioni të Kongresit të Shteteve të Bashkuara të Amerikës.

Gjatë takimit, Haxhiu shprehu mirënjohje për mbështetjen e vazhdueshme që ShBA-ja dhe Kongresi Amerikan i kanë dhënë Kosovës ndër vite, duke theksuar rëndësinë historike, politike dhe njerëzore të kësaj mbështetjeje për qytetarët e vendit.

“Për Kosovën, miqësia me Shtetet e Bashkuara është edhe institucionale por edhe personale. Populli ynë e mban mend kush qëndroi pranë nesh në momentet më përcaktuese të historisë sonë moderne”, deklaroi Haxhiu.

Ajo falënderoi kongresistin Keith Self për mbështetjen ndaj aspiratës së Kosovës për anëtarësim në NATO, si dhe për angazhimin lidhur me të drejtat e shqiptarëve në Luginën e Preshevës.

Sipas Haxhiut, anëtarësimi i Kosovës në NATO mbetet një çështje kyçe për sigurinë afatgjatë të vendit, paqen rajonale dhe pozicionimin e Kosovës mes shteteve demokratike.

Në takim u vlerësua edhe pjesëmarrja e kongresistit Suhas Subramanyam në delegacion, me fokus në mundësitë e bashkëpunimit në fusha si teknologjia, siguria kibernetike, arsimi, inovacioni dhe shërbimi publik.

Haxhiu theksoi se Kosova mbetet e përkushtuar për forcimin e partneritetit me ShBA-në në fushat e sigurisë, mbrojtjes, ekonomisë, diplomacisë dhe integrimit euroatlantik.

Ajo shtoi se Kosova synon ta nderojë miqësinë me ShBA-në duke mbetur një partnere e besueshme për paqe, siguri dhe zhvillim demokratik.

Rruga Press