FMN-ja kundër bordeve të çmimeve: Zëvendësojini me mbështetje për të varfërit

Fondi Monetar Ndërkombëtar këshillon qeverinë shqiptare që të heqë dorë nga bordet e kontrollit të çmimeve dhe në vend të tyre të përdorë të ardhurat e siguruara shtesë prej TVSh-së dhe taksave të tjera nga rritja e çmimeve për të ndihmuar shtresat në nevojë.

Me një gjuhë të zbutur, FMN i cilëson bordet dhe caktimin e çmimeve tavan si jofunksionale dhe me sfida të mëdha.

“Duke marrë parasysh sfidat e bordit të transparencës që monitoron çmimet e ushqimeve bazë, shohim me vend zëvendësimin e këtij bordi me mbështetje të mirëshpërndarë për të varfërit dhe shtresat e në nevojë me qëllim mbrojtjen e tyre nga efektet e rritjes së ?mimeve”, thuhet në deklaratën që misioni i FMN-së lëshoi pas vëzhgimit tradicional pranveror.

FMN thotë se rritja e çmimeve në Shqipëri do të zgjasë deri në vitin 2024. Në lidhje me taksat, misioni e vlerëson mosuljen e tyre si të drejtë. Nëse taksat do të uleshin në këtë moment, sipas FMN-së, ata që do të përfitonin më shumë do të ishin të pasurit.

Deklarata kërkon kujdes edhe me borxhit dhe sugjeron që të ardhurat shtesë të qeverisë të përdoren edhe në këtë drejtim.

Rruga Press