Dëshmitarja: Gratë boshnjake që mbaheshin në kampin e burgimit u përdhunuan

Një ish e ndaluar tha në gjyqin për krime lufte të ish-ushtarit serb të Bosnjës Novak Stjepanoviç se gratë që mbaheshin të ndaluara u nxorën nga kampi i burgut i minierës Sase pranë Srebrenicës në 1992 për t’u përdhunuar.

Begajeta Mujiç, një civile boshnjake, i tha Gjykatës së Lartë të Beogradit të hënën se të burgosurat e mbajtura në kampin e burgut të minierës Sase në komunën e Srebrenicës nga forcat serbe të Bosnjës në vitin 1992 ishin nxjerrë që aty dhe ishin përdhunuar.

Ish-ushtari serb i Bosnjës Novak Stjepanoviç është në gjyq për përdhunimin e një të reje boshnjake në një shtëpi në Bratunac në fillim të qershorit 1992.

Aktakuza pretendon se viktima është nxjerrë nga kampi i burgut në një datë të pacaktuar dhe është zhvendosur në Bratunac, ku është mbajtur e burgosur në një shtëpi.

Të nesërmen, pasi u transferua në një shtëpi tjetër, Stjepanoviç dyshohet se e urdhëroi të hiqte rrobat dhe të shtrihej në një shtrat, dhe më pas e përdhunoi.

Stjepanoviç është vetëdeklaruar i pafajshëm.

Mujiç dëshmoi se viktima dhe motra e saj u mbajtën të burgosura së bashku me civilë të tjerë boshnjakë në kampin e minierës Sase.

Ajo tha se vajzat e reja merreshin nga kampi dhe më pas silleshin përsëri aty.

E pyetur për viktimën në rastin Stjepanoviç dhe motrën e saj, Mujiç tha se ato u kthyen “me lot në sy”.

“Ato nuk thanë asgjë. Ne i pyetëm, por ajo nuk donin të tregonin gjë, kështu që nuk deshëm t’u bënim presion”, tha ajo në gjykatë.

Mujiç tha se nuk mbante mend nëse Stjepanoviç, të cilin ajo tha se e njihte para luftës, ishte i pranishëm kur viktima dhe motra e saj u morën nga kampi.

Mujiç tha se ajo u kap në maj 1992 së bashku me mbesën e saj, e cila gjithashtu u nxor nga kampi i burgut dhe u përdhunua.

Gjyqi do të vazhdojë në prill.

Rruga Press