Çun Lajçi i ashpër ndaj PDK-së: Vuçiqi e mori sinjalin; – s’ke nevojë për Vagnerin, se kauboj ke sa të duesh n’Parlamentin e shqiptarëve
Shkruan Çun Lajçi
Lueje kuletën se shqiptarët i blenë ma leht seç kujton!
Mbramë s’isha n’Shëngjinin e vitit 23. Po kthehesha kujtimeve mbramë, të mesnatave, kur dilnim nga Kinema Rinia e futeshim n’korzon e Prishtinës, tue spjegua filmin me Gjinën, Bardonë, Llankaster, Vejn e Bekimin!
E puthi! E palloj! E preu! E vjerri! E lidhi për kaktusi! Mizat e krymbën n’shkretinë!
Rrugicave të Prishtinës ua spjegonim filmat, atyne që s’kishin pare me shkua n’kinema e qyteti zhurmonte me emna yjesh deri të konviket, aty ku sot rrin si fantazmë kisha e Milloshit!
Sa e bukur! Gojë qibritli! Fytverdhë! Sy filxhan! Vetull fiskajë! Belin unazë!
Sa i shpejt n’kobure! Sa i leht mbi kal! Sa grushtfortë! Sa spiune ajo bjondja – Dhe Prishtina bahej ekran i madh me aktore e aktor holivudi mesnatave të çdo stine!
Kjo zhurmë m’erdhi mbramë n’Shetitorën e pastërt të Shëngjinit nga kosovarët që e kan si t’vetën. Madje madje, s’lexon gja tjetër pos; – Restorant Prizreni, Gjakove, Suhareke, Hasi, thua ti se nji Kosovë e Re asht ringritë n’Shëngjinin e heshtun!
Shëtisnin pushuesit tue i tjerrë grushtët n’Parlamentin e Kosovës, njisoj si ne n’vitet 70-ta, kur i spjegonim filmat!
– Me ujë e stërpiku! S’u ba nami! E flladiti pak se ishte tepër nxeht!
– Ç’iu desht atij picimulit me gjuejtë me shishe plastike. Ajo nuk thehet!
– Ata me sprej e tym lotsjellës i qorronin! Këta me ujë!
– Ky Xhejms Bondi e kishte grushtin e randë! Syzet i fluturuen ministrit! E la pa sy! Terr ia bani!
Dhe qesheshin pushuesit n’Shëngjin!
– Ku mbeti burrnia? Nji grua u fut ndërmjet dhe prap ky kauboi grushtonte! Pse nuk ia dha nji flakareshë Mimit, që po flet me shkije, po ministreshën donte me shkye!
Fliste njeni e tjetri e shetitorja bahej ekran filmi!
Unë i dëshpëruem, shkrova n’ranën e hedhun buzë detit: – I treguem Evropës se shqiptari i untë e serbi i pitë janë të barabartë!
– Lakmitar për pasuni i pari e lakmitar për toka i dyti!
Vuçiqi e mori sinjalin; – s’ke nevojë për Vagnerin, se kauboj ke sa të duesh n’Parlamentin e shqiptarëve që ta bajnë argatin për rubla e dinar! Lueje kuletën se shqiptarët i blenë ma leht seç kujton! Për pare ta shesin jo vetëm veriun, po edhe jugun!
– Kallxoje kuletën e Cecën e çaraveshu!
Rruga Press