Çështja “Becchetti”/ 447 milion euro, gjoba e Ramës për familjet shqiptare. SPAK të hetojë me përparësi

Partia Demokratike pret që Prokuroria e Posaçme, SPAK, “të hetojë me përparësi” çështjen “Becchetti”, sepse “çdo orë vonesë tashmë përkthehet në një dëm ekonomik të pakthyeshëm për qytetarët”.

Në një postim në rrjetet sociale, PD shkruan se “447 milionë euro, është fatura e Edi Ramës për familjet shqiptare” dhe kujton se në 8 prill 2021 ka depozituar në SPAK kallëzimin penal.

“Imagjinoni sa probleme të vogla dhe të mëdha për shqiptarët do të zgjidhte kjo shumë marramendëse, që fatkeqësisht do të kthehet në një peshë për buxhetin e çdo familje, që do të detyrohet të paguajë papërgjegjshmërinë e Edi Ramës. 447 milionë euro nuk do të shkojnë për spitale, shkolla, kopshte, investime në infrastrukturë, ndihmë ekonomike për njerëzit në nevojë, por për të paguar dëmet e shkaktuara nga një pakicë që ka shkatërruar ekonominë dhe po varfëron shqiptarët.

Në 8 prill 2021 Partia Demokratike ka depozituar në SPAK kallëzimin për çështjen “Becchetti”.

Ne presim që ajo të hetohet me përparësi, sepse çdo orë vonesë tashmë përkthehet në një dëm ekonomik të pakthyeshëm për qytetarët”, shkruan PD.