Bosnja lë në fuqi dënimin e ish-policit serb për krime kundër njerëzimit

Gjykata boshnjake la në fuqi vendimin që dënon ish-policin rezervist Simo Stupar për përfshirje në ndalimin, rrahjen dhe vrasjen e paligjshme të boshnjakëve në zonën e Vlasenicës në vitin 1992.

Dhoma e apelit e gjykatës shtetërore të Bosnjës konfirmoi të enjten vendimin që dënon Simo Stupar, një ish-polic rezervist në Stacionin e Sigurisë Publike në Vlasenicë, me 12 vjet burg për krime kundër njerëzimit.

Gjykata shtetërore tha se kishte “refuzuar si të pabazuar një apel të paraqitur nga avokati mbrojtës i të pandehurit”.

Vendimi u dha në mungesë të Stuparit pasi ai u largua nga Bosnja dhe Hercegovina në tetor dhe aktualisht është i arratisur.

Ai fillimisht u shpall fajtor në maj të këtij viti për pjesëmarrje në një sulm të gjerë dhe sistematik ndaj popullatës boshnjake në zonën e Vlasenicës nga prilli 1992 deri në fund të shtatorit të atij viti, si pjesëtar i forcës policore rezerviste të Stacionit të Sigurisë Publike në Vlasenica.

Vendimi thoshte se Stupar mori pjesë në një sulm në fshatin Dzamici në zonën e Vlasenicës më 18 maj 1992, kur pesë persona u vranë dhe disa shtëpi u dogjën.

Ai dhe tre të tjerë gjithashtu morën pjesë në vrasjen e një civili me aftësi të kufizuara.

Vendimi zbuloi se Stupari mori pjesë më tej në rrahjen e një civili boshnjak në stacionin policor në Vlasenicë në gjysmën e parë të qershorit 1992 dhe në trajtimin çnjerëzor të një burri tjetër.

Personi i dytë u godit me zinxhirë në shpinë dhe u urdhërua të ulej këmbadoras dhe Stupari dhe të tjerët gdhendën një kryq dhe një simbol serb në shpinë të tij. Më pas i hodhën kripë plagës.

Stupari u shpall gjithashtu fajtor për pjesëmarrje në arrestimin e dy burrave më 10 korrik 1992. Pas arrestimit të tyre, dy burrat u zhdukën dhe trupat e tyre u gjetën vetëm në vitin 2007.

I pandehuri fillimisht u gjykua së bashku me Zoran Tesiç, i cili u lirua nga të gjitha akuzat.

Rruga Press