Bosnja ia ndalon hyrjen Radoiçiqit: E cilëson kërcënim për sigurinë kombëtare
Vendimi u mor më 13 nëntor, katër ditë para urdhërit të Gjikatës së Lartë në Beograd për paraburgimin e tij.
Milan Radoiçiq, i dyshuar për organizimin e sulmit në Banjskë, në veri të Kosovës, iu ndalua hyrja në Bosnje dhe Hercegovinë, pasi u shpall kërcënim për sigurinë kombëtare, konfirmuan për Radion Evropa e Lirë sipas njoftimit.
Vendimi u mor më 13 nëntor, katër ditë para se Gjykata e Lartë në Beograd të urdhëronte paraburgimin e tij dhe ta shpallte në kërkim, pasi nuk u paraqit në polici më 15 nëntor. Paraqitja e detyrueshme në polici ishte një nga masat e mbikëqyrjes të vendosura ndaj tij, në kuadër të procedurës që po zhvillohet për rastin e Banjskës.
Institucionet përgjegjëse të Bosnjës dhe Hercegovinës nuk dhanë hollësi për vendimin dhe as arsyet përse Radoiçiq cilësohet kërcënim për sigurinë kombëtare.
Vendndodhja ende e panjohur
Ndalimi nënkupton se, nëse Radoiçiq tenton të hyjë në Bosnje dhe Hercegovinë, atij do t’i refuzohet hyrja ose do të ndalohet në pikën kufitare apo në ndonjë vend tjetër të hyrjes në këtë shtet.
Vendimi vjen në kohën kur vendndodhja e Radoiçiqit mbetet e panjohur, pasi ai nuk ishte i qasshëm për organet e drejtësisë në Serbi gjatë ditëve të fundit. Më herët, atij i është konfiskuar pasaporta dhe i është ndaluar të largohej nga vendbanimi pa lejen e autoriteteve përkatëse, ndërsa ka pasur edhe ndalesë për të udhëtuar në Kosovë.
Zhdukja e tij ndodhi pas humbjes së Partisë Përparimtare Serbe (SNS) në zgjedhjet e mbajtura në fund të tetorit në Serbi. Disa ditë para se të shpallej në kërkim, qarkulluan informacione të pakonfirmuara se Radoiçiq ishte larguar nga Serbia drejt Rusisë, por Ministria e Punëve të Brendshme e Serbisë, Agjencia e Sigurisë dhe Informacionit (BIA) dhe Ambasada ruse në Beograd nuk i konfirmuan këto pretendime.
Aktakuzë në Kosovë
Radoiçiq është përgjegjës për organizimin e grupit të armatosur që ka kryer sulmin në Banjskë, më 24 shtator 2023, ku u vra një polic i Kosovës, ndërsa në përleshjet e armatosura që pasuan u vranë edhe tre sulmues serbë.
Në Serbi, ai është nën hetime për disa vepra penale që lidhen me sigurimin e armëve dhe shkaktimin e rrezikut të përgjithshëm, megjithatë, edhe pas tre vjetësh, ndaj tij nuk është ngritur aktakuzë.
Autoritetet e Kosovës kanë ngritur aktakuzë ndaj 45 personave për sulmin në Banjskë, përfshirë Radoiçiqin, i cili po gjykohet në mungesë. Kosova ka lëshuar gjithashtu fletarrestim ndërkombëtar për të, përmes Misionit të Kombeve të Bashkuara (UNMIK).
Shtetet e Bashkuara dhe Britania e Madhe kanë vendosur më herët sanksione ndaj tij, për përfshirje të dyshuar në krim të organizuar dhe korrupsion.
Largimi i bashkëpunëtorit të tij nga Bosnja
Vendimi për t’ia ndaluar hyrjen në Bosnje dhe Hercegovinë u mor vetëm disa ditë pasi nga ky vend është larguar Zvonko Vesellinoviq, bashkëpunëtor shumëvjeçar i Radoiçiqit në biznes. Burime të sigurisë në Bosnje dhe Hercegovinë kanë konfirmuar më herët se Vesellinoviq është larguar më 11 nëntor nga Sarajeva drejt Turqisë, duke përdorur pasaportën serbe.
Rruga Press

