Borut Pahor synon të jetë pasardhës i Lajçakut si emisar i BE-së në dialogun Kosovë-Serbi

Ish-presidenti i Sllovenisë, Borut Pahor, po synon ta trashëgojë pozitën e sllovakut Miroslav Lajçak në rolin e të dërguarit të posaçëm të Bashkimit Evropian në dialogun Kosovë – Serbi.

Siç shkruan sllovene “Delo” shefja e diplomacisë së Sllovenisë Tanja Fajon po e ndihmon ish-presidentin Pahor në lobimin për të marrë pozitën emisarit special në dialogun që udhëhiqet nga BE-ja.

“Siç mësohet jozyrtarisht, me ndihmën e Ministrisë së Punëve të Jashtme dhe Evropës, të udhëhequr nga ish-bashkëpartiakja e tij Tanja Fajon, Pahor po përgatitet të përparojë në pozicionin e të dërguarit special të Bashkimit Evropian për dialogun ndërmjet Kosovës dhe Serbisë, që aktualisht mbahet nga diplomati sllovak Miroslav Lajçak”, shkruan gazeta sllovene.

Sipas kësaj gazete, Ministria e Punëve të Jashtme e Sllovenisë ka vlerësuar se Pahor është një kandidat i përshtatshëm për të zënë një pozicion të rëndësishëm dhe prestigjioz në Ballkanin Perëndimor, i cili konsiderohet si zonë strategjike e Sllovenisë, ndaj vendosën që rrjeti diplomatik slloven të ndihmonte ish-presidentin e republikës në kandidaturën e tij.

“Vlerësimet jozyrtare janë se Pahor është kandidat i përshtatshëm që i plotëson kushtet për plotësimin e pozitës”, shkruan gazeta.

Duhet theksuar se për pozicionin e të dërguarit të posaçëm të Bashkimit Evropian për dialogun ndërmjet Kosovës dhe Serbisë, Pahor duhet të paraqesë një kërkesë personale, por sipas informacioneve të gazetës, ai ende nuk e ka bërë këtë në Shërbimin Evropian për Politikë të Jashtme, i cili udhëhiqet socialisti spanjoll Josep Borrell.

Mandati i dytë dyvjeçar i Miroslav Lajçakut si emisar në dialogun Kosovë-Serbia skadon në fund të gushtit të këtij viti.

Rruga Press