“Bild” zbulon dokumentin sekret/ Rusia mund të nisë një luftë të madhe me NATO-n në shkurt

Një konflikt i madh i armatosur midis NATO-s dhe Rusisë duket i pashmangshëm nëse do t’i besojmë një dokumenti sekret të Forcave të Armatosura Gjermane. Dokumenti i cituar nga gazeta gjermane “Bild” thotë se Rusia do të pushtojë shtetet baltike të NATO-s që në korrik. Forcat e Armatosura Gjermane (Bundeswehr) po përgatiten për një sulm të mundshëm hibrid nga Rusia në krahun lindor të NATO-s në muajin shkurt, raportoi Bild.

“Një përshkallëzim midis NATO-s dhe Rusisë pritet që në shkurt”, – tha një burim i “Bild” duke iu referuar një dokumenti sekret të Bundeswehr-it. Dokumenti konfidencial detajon se si mund të lindë një konflikt midis Rusisë dhe NATO-s, me ngjarje që shpalosen muaj pas muaji. Kulmi përfshin vendosjen e qindra mijëra ushtarëve të NATO-s dhe fillimin e luftës në verë.

Shkrimi i Bild zbulon një skenar lufte që fokusohet te siguria dhe shmang specifikat në lidhje me numrin dhe lëvizjen e trupave të NATO-s. Skenari i “Aleancës së Mbrojtjes 2023” të Bundeswehr-it parashikon që mobilizimi rus do të fillojë në shkurt 2024, i ndjekur nga një ofensivë pranverore në Ukrainë dhe një sulm ndaj vendeve baltike në korrik. Priten gjithashtu edhe sulme kibernetike dhe forma të tjera të luftës hibride.

Tensionet mund të arrijnë kulmin në tetor me Rusinë duke lëvizur trupa dhe raketa në Kaliningrad (një enklavë ruse në Poloni – red.). “Konfliktet kufitare” dhe “trazirat me viktima të shumta” janë të mundshme në “korridorin Suwalki” (korridori i vogël midis Bjellorusisë dhe Kaliningradit që shtrihet përgjatë kufirit polako-lituanez – red.) në dhjetor 2024. Rusia mund të përsërisë pushtimin e saj të vitit 2014 të Ukrainës në territorin e NATO-s me mbështetjen e Bjellorusisë, pas zgjedhjeve në SHBA, kur Shtetet e Bashkuara mund të bëhen pa lider.

Skenari përfundon 30 ditë pas “D-Day”, kur NATO, duke përfshirë Bundeswehr-in, vendos forca të rëndësishme ushtarake në krahun lindor. Megjithatë, nëse NATO do të jetë në gjendje të frenojë Rusinë, mbetet një pyetje e hapur në këtë skenar. ©LAPSI.al

Rruga Press