BE kërkon që të hetohen parregullsitë në zgjedhjet në Serbi: E drejta për të protestuar duhet respektuar, dhuna ndaj qytetarëve e papranueshme

Bashkimi Evropian ka bërë thirrje që të hetohen rastet e akuzave për parregullsi gjatë zgjedhjeve që u mbajtën në Serbi më 17 dhjetor dhe që të ruhet qetësia.

Lajmin e bëri të ditur zëdhënësja e BE-së, Nabila Massrali, duke u përgjigjur në pyetje rreth zhvillimet e fundit në Serbi, ku po vazhdojnë protestat me kërkesa për anulimin e zgjedhjeve dhe shpalljen zgjedhjeve të reja.

“Ankesat për parregullsi në zgjedhje duhet të hetohen dhe të adresohen në mënyrë të duhur. Përderisa e drejta për protesta paqësore duhet të respektohet, dhuna nuk është zgjidhje dhe është e papranueshme”, tha ajo.

Partia Progresive Serbe (SNS) e presidentit të Serbisë, Aleksandar Vuçiq, ka shpallur fitore në të gjitha nivelet.

Misioni vëzhgues i Organizatës për Siguri dhe Bashkëpunim në Evropë tha më 18 dhjetor se zgjedhjet u përshkruan me parregullsi serioze, keqpërdorim të fondeve shtetërore, me fushatë negative dhe përhapje të frikës.

Ndërkaq, eurodeputetët kanë kërkuar hetim të pavarur për të gjitha parregullsitë në zgjedhjet serbe.

Shtetet e Bashkuara po ashtu u kanë bërë thirrje autoriteteve në Serbi që të hetojnë pretendimet për parregullsi të bëra nga vëzhguesit ndërkombëtarë.

Më 24 dhjetor, lista opozitare, “Serbia kundër dhunës” – që ka organizuar disa protesta kundër rezultatit zgjedhor – protestoi para Kuvendit Komunal në Beograd, duke kërkuar anulimin e zgjedhjeve.

Rruga Press