BE i vendos sanksione të reja Rusisë, Kallas: Kremlini nuk do ta thyejë vendosmërinë tonë

Sanksionet e BE-së kundër Rusisë do të zgjerohen për të mbuluar importet e aluminit dhe dhjetëra anije të tjera “në hije” që eksportojnë fshehurazi naftën ruse nën një kufi çmimi të vendosur nga aleatët perëndimorë.

Miratimi i paketës ka peshë shtesë, mes frikës në Bruksel se Donald Trump do të kërkojë të heqë sanksionet e SHBA-së kundër Rusisë, si pjesë e përpjekjes së tij për të bërë një marrëveshje paqeje.

Përfaqësuesja e Lartë e BE-së, Kaja Kallas, shkroi në X duke thënë se me këto sanksione i mbyllin dyert e pasme Rusisë për importe dhe eksporte dhe shtoi se Kremlini s’e thyen vendosmërinë e Unionit.

“E mirëpres marrëveshjen për paketën tonë të 16-të të sanksioneve. Me masa më të rrepta për shmangien, ndalimet e reja të importit dhe eksportit dhe sanksionet ndaj flotës hije të Putinit, ne po mbyllim dyert e pasme që makineria e luftës ruse të funksionojë. Kremlini nuk do ta thyejë vendosmërinë tonë”.

73 anije të tjera që besohet se po anashkalojnë kufirin e çmimit të naftës do të ndalohen nga portet e BE-së, megjithëse kjo nuk mbulon të gjitha cisternat e vjetruara që mendohet se po ndihmojnë Rusinë të shmangë sanksionet.

Gjithsej 48 persona dhe 35 subjekte përballen me ngrirjen e aseteve dhe ndalimin e udhëtimit, megjithëse emrat e tyre nuk janë bërë të ditur. BE-ja po heq gjithashtu licencat e transmetimit nga 8 media ruse dhe po përjashton 13 banka nga sistemi i pagesave ndërkombëtare Swift, transmeton Gazeta Express.Në një draft të mëparshëm, BE-ja planifikoi të ndalonte shitjen e konzollave të lojërave dhe levës në Rusi, të cilat mendohet se do të ripërdoren për t’u përdorur në luftën me dron.

Rruga Press